АҚШ собиқ президенти Дональд Трамп Россия қўшинларининг Украина чегарасига жойлаштирилиши бу музокаралар ўтказишнинг «қаттиқ, бироқ ақлли» усули деб ўйлаган. Бу ҳақда у Wаshington Examiner’га берган интервьюсида маълум қилди.
Трамп Россия президенти Владимир Путин Украинада ҳарбий операция бошлаганидан ҳайратда қолганини тан олган.
«Мен ҳайратдаман, ҳайратда. Владимир Путин ҳарбийларни чегарага юборганда шу усулда музокара ўтказяпти деб ўйладим… Бу музокаралар ўтказишнинг қаттиқ, бироқ ақлли усули деб ўйладим. У ҳамма каби Қўшма Штатлар билан яхши битимга келишиш ниятида дея ҳисобладим, худди бошқа одамлар ҳар қандай савдо битимида келишиш ниятида бўлгани каби», — дейди Дональд Трамп.
АҚШнинг 45-президентининг фикрича, Россиянинг Украинада ҳарбий операция бошлаш қарори «бутун дунё учун қайғули» бўлган. Трамп Путин билан айнан ўзи «жуда қаттиқ» муносабатда бўлганини, шунга қарамай, у билан диалог қура олганини таъкидлаган.
Аввалроқ Дональд Трамп Украина атрофидаги вазият Учинчи жаҳон урушига олиб келиши мумкинлигини маълум қилганди. Унинг ҳисоблашича, бу каби фожиа Владимир Путин билан «гаплаша оладиган одам йўқлиги» учун содир бўлади.
24 февраль куни Россия президенти Владимир Путин Донбассдаги маҳаллий аҳолини «геноцид»дан қутқариш мақсадида махсус операция бошланганини эълон қилди. Украинада уруш роппа-роса уч ҳафтадан бери давом этмоқда. 16 март куни Киевда кучайтирилган комендантлик соати амалда бўлди — аҳолига махсус рухсатномаларсиз уйларини тарк этиш тақиқланди. Мариуполда драма театри биноси бутунлай вайрон қилинди. Украина президенти Владимир Зеленский АҚШдан мамлакат осмонини ёпишни ёки ҳаво мудофаасини таъминлашни талаб қилди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)