Хитойда тайёрланган сохта ассиз маркаларни Ўзбекистонга олиб кирилишига чек қўйилди. Бу ҳақда Божхона қўмитаси хабар берди.
Божхоначилар Андижон, Самарқанд, Фарғона вилоятлари ҳудудларида трансчегаравий жиноий гуруҳни фош қилди.
Қайд этилишича, дастлаб Қирғизистон божхона хизматидан маълумот олинган. Кейин самолётда Хитой-Қирғизистон йўналишида Бишкек шаҳрига олиб келинган халқаро курерлик жўнатмасида Ўзбекистон акциз маркаларининг 2,5 миллион дона қалбаки нусхаси борлиги аниқланган.
“Хитойда тайёрланган сохта маркалар дастлаб Қирғизистонга, сўнгра Ўзбекистонга олиб кирилиши режалаштирилган. Ўтказилган тезкор тадбирнинг дастлабки босқичида Бишкек шаҳрида акциз маркаларни Ўзбекистонга олиб кетиш мақсадида қабул қилиб олган қўшни мамлакат ва Ўзбекистон фуқаролари божхона ходимлари томонидан қўлга олинди. Шундан сўнг, тезкор тадбир мамлакатимиз ҳудудида, яъни Андижон вилоятининг Бўстон туманида давом эттирилиб, қалбаки акциз маркаларни қабул қилиб олаётган Ўзбекистон фуқароси ҳам ушланди. Ушбу фуқаро қалбаки акциз маркаларни Самарқанд вилоятида яшовчи фуқарога етказиб бериши керак эди”, дейилади манбада.
-0OOvg4_T.avif)
Текширув занжири Самарқанд вилоятига етиб, ҳудудда қалбаки акциз маркаларни қабул қилиб олувчи асосий шахс қўлга олинган. Фуқаронинг яшаш хонадони кўздан кечирилганда Ўзбекистон акциз маркаларининг 710 минг дона қалбаки нусхалари топилган.
Ўтказилган тадбирлар давомида жами 3 миллион 210 минг дона Ўзбекистонда алкоголь маҳсулотларини қадоқлаш учун фойдаланиладиган қалбаки акциз маркалар айланмасига чек қўйилган.
“Бунинг натижасида давлат бюджетига 34,2 миллиард сўм (2,7 миллион доллар-таҳр.) зарар етказилишининг олди олинган. Шу билан бирга, минглаб юртдошларимизнинг саломатлиги асраб қолинди”, дейилади қўмита хабарида.
Ҳозирда мазкур ҳолат юзасидан божхона органлари томонидан жиноят иши қўзғатилган.
Аввалроқ Фарғона вилоятида божхона пости раҳбари 5 минг доллар пора олаётганда ушлангани хабар қилинганди.
Изоҳ (0)