Apple компанияси сунъий интеллектни қўллаб-қувватловчи iOS 18.1 янгиланишини тақдим этди. У қандай афзалликларга эга эканини қуйида кўриб чиқамиз.
Асосий янгиликлар Apple Intelligence сунъий интеллект тизимидан ташқари Writing Tools, Reduce Interruptions ва “Фото” иловасида таҳрирлаш воситалари каби функцияларни ўз ичига олади. Бироқ СИни қўллав-қувватловчи янгиланишлар iPhone 15 Pro, Pro Max ва iPhone 16 сериясидагина мавжуд. Шунга қарамасдан, Apple фойдаланувчилар учун фойдали бошқа функцияларни тақдим этмоқда.
Матн билан ишлаш воситалари энди ҳар қандай иловада матнни таҳрирлаш ва оптималлаштириш имконини беради, Reduce Interruptions функцияси эса фойдаланувчи смартфонга камроқ чалғиши учун билдиришномаларни устуворликка қараб тартиблайди. “Фото” иловасида расмлардаги ортиқча объектларни олиб ташлаш мумкин.
Siri овозли ёрдамчиси энди контекстга оид пауза ва сўровлардаги ўзгаришларни тушуна олади, почта дастурида эса “Устувор хабарлар” ва “Ақлли жавоблар” функциялари пайдо бўлди. Бундан ташқари, телефон қўнғироқларини ёзиб олиш функцияси қўшилди.
Шу билан бирга, айрим мамлакатларда Apple ташқи дастурчилар учун NFC қўллаб-қувватлашни жорий этди. Бу эса турли иловалар орқали учинчи томон тўловларини амалга ошириш, смартфонга NFC-белгиларини киритиш ва бошқа имкониятларни яратади.
Янгиланиш ҳажми 1,8 Гбайт, аммо Apple Intelligence функциялари учун камида 4 Гбайт бўш жой керак. XS’дан бошлаб барча iPhone эгалари iOS 18.1 ўрнатиши мумкин. ChatGPT билан интеграция ва тасвир генератори каби бошқа функциялар iOS 18.2 янгиланишида пайдо бўлади.
Изоҳ (0)