Шимолий Корея ҳукумати ўлим жазоси назарда тутилган жиноятлар рўйхатини кенгайтирди.
“Эндиликда оқ рангдаги тўй либослари, кўк жинси шимлар кийганлик ёки қуёшдан ҳимояловчи кўзойнак таққанлик учун қаттиқ жазо қўлланилади”, дея Yonhap хабар берган.
Нашрга кўра, янгиланган кодекслар доирасида ўлим жазоси назарда тутилган янги жиноятлар, жумладан, давлатга қарши ташвиқот, шунингдек, қуролни ноқонуний ишлаб чиқариш ва ундан фойдаланиш кабилар ҳам қўшилган.
Август ойи охирида КХДР ҳукумати мамлакат шимоли-ғарбидаги сув тошқинлари сабабли 20 дан ортиқ амалдорни қатл қилган эди. Оммавий ахборот воситаларининг ёзишича, қатлларга амалдорларнинг табиий офат етказган зарарнинг олдини ололмагани сабаб бўлган. Чаганг провинциясида юз берган сув тошқинлари ва кўчкилар туфайли 4000 киши ҳалок бўлгани хабар берилганди.
Давлат оммавий ахборот воситалари кучли ёмғирлар 4100 та уйни, 7410 гектар қишлоқ хўжалиги ерлари, кўплаб администрация бинолари ҳамда иншоотларни вайрон қилганини маълум қилган. Шунингдек, шимоли-ғарбдаги Синийжу шаҳри ва унга қўшни Уйжу шаҳридаги йўллар ювилиб, темир йўллар сув остида қолган.
Шундан сўнг Ким Чен Ин табиий офатларнинг олдини олиш бўйича ўз вазифаларини эътиборсиз қолдирган амалдорларни “қаттиқ жазолаш”ни талаб қилганди.
Изоҳ (0)