Хитой Ташқи ишлар вазирлиги расмий вакили Лин Сзян Америка расмийларидан коинотни ҳарбийлаштиришни тўхтатишни талаб қилди. Бу ҳақда “ТАСС” хабар берди.
Хитой мулозимига кўра, Пекин коинотда қурол-яроғ жойлаштирилишига қарши.
“Хитой ҳар доим космик бўшлиқдан тинчлик мақсадида фойдаланишни ёқлаб келган, қуролланиш пойгаси ва космосга қурол жойлаштиришга қарши чиқиб келган. Биз Қўшма Штатларни масъулиятсиз баёнотларни тўхтатишга, космик бўшлиқда ҳарбий кенгайиш ва урушга тайёргарлик кўришни бекор қилишга чақирамиз”, деди у.
Хитойлик дипломат Пекин ҳеч қайси мамлакат билан космик мусобақага киришиш ниятида эмаслиги ва космосда устунликка эришишга интилмаётганини айтди. У Қўшма Штатлар “космик фазони очиқчасига жанг майдонига айлантираётгани, бу барча мамлакатларнинг хавфсизлик ва ривожланиш борасидаги ҳуқуқларига жиддий таҳдид солаётгани”ни билдирди.
Лин Сзян АҚШ “космосда барқарор тинчлик ва хавфсизликни таъминлашга муносиб ҳисса қўшиши” учун зарур чоралар кўриши лозимлигини айтди.
Аввалроқ Bloomberg АҚШ Космик кучларига таяниб, АҚШ армияси 2025 йилдан сунъий йўлдошларни радиоэлектрон тарзда бостириш учун янги кўчма станцияларни қўллай бошлаши ҳақида хабар берганди. Гап асосан Россия ва Хитойга қарши курашиш учун мўлжалланган Meadowlands тизими ҳақида кетган.
Изоҳ (0)