Андижон вилояти жиноят ишлари бўйича Хонобод шаҳар суди раисига жиноят иши қўзғатилганди. Олий суд у 30 минг доллар олганида ушланганини маълум қилди.
-uvXlH4R_.avif)
Олий суд пленумининг мажлисида бош прокурорнинг жиноят ишлари бўйича Хонобод шаҳар судининг раиси Ю.Э.ни Жиноят кодексининг 168-моддаси 4-қисми “а” банди ва 28,211-моддаси 3-қисми “а” банди билан жиноий жавобгарликка тортиш ва унга нисбатан қамоққа олиш тарзидаги эҳтиёт чорасини қўллаш ҳақидаги тақдимномаси кўриб чиқилиб, розилик берилган.
Тақдимномага кўра, жиноят ишлари бўйича Хонобод шаҳар судининг раиси муқаддам бошқа суд томонидан тайинланган озодликдан маҳрум қилиш жазоси муддатини камайтиришни ваъда қилиб, судланган шахснинг онасидан 30 минг доллар миқдордаги пулларни олган вақтда ҳуқуқни муҳофаза қилувчи органлар ходимлари томонидан ўтказилган тадбирда ушланган.
“Олий суд томонидан суд органларида коррупцияга қарши курашиш, тизимни нопок кадрлардан тозалаш борасида барча зарур саъй-ҳаракатлар амалга оширилмоқда. Бунда, энг аввало, судья ва ходимлар ўртасида ножўя ва номуносиб хатти-ҳаракатларнинг олдини олиш, шу билан бирга, коррупцияга йўл қўйган судья ва ходимларни аниқлаш ҳамда уларга нисбатан қатъий чоралар кўришга эътибор қаратилмоқда”, дейилади Олий суд хабарида.
Ю.Э. Хонобод шаҳар судининг раиси лавозимига 2024 йилнинг декабрида беш йил муддатга тайинланганди. Айни пайтда унинг судьялик ваколати тўхтатилган.
Апрель ойининг охирларида Тошкент шаҳридаги кафеларнинг биридан маст ҳолда чиққан ва машина ўғирлашда гумонланган Миробод туман суди судьяси ваколати муддатидан аввал тугатилганди. Унга нисбатан жиноят иши қўзғатилган.
Изоҳ (0)