Ҳоррор жанри ҳар доим жаҳон киносининг машҳур йўналишларидан бири бўлиб келган, аммо Жанубий Корея кино саноати ривожлангач, мазкур жанр бутунлай янги босқичга кўтарилган.
Жанубий Кореянинг даҳшатли фильмлари бошқалардан фарқи шундаки, унда режиссёрлар қўрқувни турли махлуқлар ёки қонли саҳналар билан эмас, балки инсон руҳияти, жамиятдаги муаммолар ва корейс маданиятига хос унсурлардан фойдаланиб кўрсатади. Шунинг учун корейс ҳоррор фильмлари нафақат қўрқитади, балки чуқур ўйлашга, воқеаларнинг маъносини англашга ҳам туртки беради.
“Пусанга борадиган поезд” (2016)
2016 йилда Жанубий Кореяда энг кассабоп фильмлардан бирига айланган ушбу лойиҳа кейинчалик стриминг платформаларда ҳам яхши натижаларга эришди. Фильм воқеалари Сеулдан Пусанга кетаётган тезюрар поездда бошланади. Шу пайтда мамлакат бўйлаб номаълум вирус тарқалиб, одамларни ёввойи зомбиларга айлантира бошлайди. Поезд ичида эса оддий йўловчилар ҳаёт учун курашишга мажбур бўлиб қолади. Улар орасида ота ва унинг кичкина қизи, ҳомиладор аёл ва эри, мактаб ўқувчилари ҳам бўлади. Ҳар бир бекатда хавф тобора кучайиб, тирик қолиш учун йўловчилар инсонийлик ва фидойилик синовидан ўтади.
“Икки опа-сингил тарихи” (2003)
“Икки опа-сингил тарихи” — корейс режиссёри Ким Живун томонидан суратга олинган бўлиб, корейс ҳоррор фильмлари орасида алоҳида ўрин эгаллаган. Сюжет марказида руҳий касалликлар шифохонасидан уйига қайтган икки опа-сингил туради. Улар уйга келгач, ўгай онага дуч келади ва оилада зиддиятли муносабатлар бошланади. Бир вақтнинг ўзида, уй ичида тушунарсиз овозлар, сирли ҳодисалар ва ваҳимали манзаралар пайдо бўла бошлайди.
Фильм кўплаб кино танқидчилари томонидан корейс ҳоррор жанрининг энг юксак намунаси сифатида баҳоланган. Фильм кейинчалик Голливудда “The Univited” (2009) номи билан ремейк қилинган бўлса-да, асл версияси ҳамон энг муваффақиятлиси сифатида тан олинади.
“Хизматкор қиз” (1960)
Сўнгги йилларда бутун дунёни ҳайратда қолдирган “Паразитлар” фильмини яратишга илҳом берган бу асар Жанубий Корея киносининг энг ёрқин намуналаридан бири ҳисобланади. Сюжетга кўра, янги уйга кўчиб ўтган оила бошлиғи уй юмушлари учун хизматкор қизни ишга олади. Унинг рафиқаси икки фарзандини тарбиялаётган бўлади ва оқсоч қизга уй юмушларида ёрдам бериш вазифаси юклатилади. Аммо вақт ўтиши билан хизматкор бир вақтлар севгисига хиёнат қилган эркакдан қасос олиш учун қотилга айланади.
“Деворлар шивири” (1998)
Бир вақтнинг ўзида ҳам психологик триллер, ҳам ҳоррор фильм бўлган “Деворлар шивири” Жанубий Кореяда ҳарбий диктатура тугаганидан кейин намойиш этилди. Шу боис фильм ўша давр ижтимоий муаммоларига ҳам ишора қилади.
Фильм воқеалари қизлар мактабида кечади. Бир ўқитувчи эски синф журналларида сирли ёзувларни кўриб қолади ва мактаб деворлари ичида кимнингдир руҳи яшаётгани ҳақида гумон қилади. Орадан кўп ўтмай, у сирли тарзда ҳалок бўлади. Мактабдаги қизлар эса аста-секин ўз тенгдошлари ва ўқитувчиларини таъқиб қилаётган ёвуз кучни сезиб қолади.
“Конжиамдаги руҳий касалликлар шифохонаси” (2018)
Мазкур фильм реал воқеаларга асосланган бўлиб, унда бир гуруҳ блогерлар машҳурликка эришиш учун ташландиқ Конжиам шифохонасида жонли эфир ўтказишга қарор қилади. Улар бино ичига киргач, кутилмаган ғайритабиий ҳодисалар бошланади: эшиклар ўз-ўзидан ёпилади, қоронғи хоналарда кимдир пайдо бўлиб йўқолади. Дастлаб шоу сифатида бошланган лойиҳа аста-секин ҳақиқий даҳшатга айланади.
Изоҳ (0)