Давлат хавфсизлик хизмати ходимлари томонидан ўтказилган тезкор тадбирлар давомида Жиззах ва Самарқанд вилоятларида коррупция ҳолатларига чек қўйилди.
Қайд этилишича, Шароф Рашидов тумани Ички ишлар бўлими Вақтинча сақлаш ҳибсхонаси бошлиғи ҳозирда айблов эълон қилиниб, мазкур ҳибсхонада сақланаётган шахсга нисбатан жиноят ишини кўриб чиқаётган судья томонидан озодликдан маҳрум қилиш билан боғлиқ бўлмаган жазо тайинланишида ёрдам бериш эвазига 10 минг доллар талаб қилган.
Давлат хавфсизлик хизмати ходимлари томонидан ўтказилган тезкор тадбирда у сўралган пул маблағидан 5 минг долларни олган вақтида ушланган.
Терговга қадар текширув давомида, мазкур мансабдор шахс муқаддам ўз хизмат мавқейидан фойдаланиб, ҳибсхонада сақланаётган ушбу фуқаронинг оила-аъзолари билан учрашиши ҳамда уйидан олиб келинган озиқ-овқат маҳсулотларининг киритилиши учун рухсат бериш эвазига 400 доллар олгани ҳам маълум бўлган.
Миллий гвардиянинг Самарқанд вилояти Иштихон туманлараро Қўриқлаш бўлими ходими маҳаллий фуқарога нисбатан ички ишлар органлари томонидан Жиноят кодексининг 168-моддаси (фирибгарлик) 3-қисм “в” банди ва 211-моддаси (пора бериш) 1-қисми билан қўзғатилган жиноят ишини танишлари орқали унинг фойдасига ижобий ҳал қилиб бериш эвазига 1,5 минг доллар олган вақтида ДХХ ходимлари томонидан ушланган.
Ҳозирда ушбу шахсларнинг барчасига нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Эслатиб ўтамиз, декабрь бошларида Давлат хавфсизлик хизмати ходимлари томонидан ўтказилган тезкор тадбирда Олий суднинг Жиноят ишлари бўйича судлов ҳайъати катта консултанти фуқародан 10 минг доллар олган вақтида ушланган эди.
Изоҳ (0)