Ўзбекистон Олий Мажлисининг инсон ҳуқуқлари бўйича вакили қошидаги Миллий превентив механизмлар бўйича ишчи гуруҳи Навоий вилоятидаги жазони ижро этиш муассасаларига сафар қилди. Бу ҳақда Ўзбекистон инсон ҳуқуқлари «Эзгулик» жамияти матбуот хизмати маълум қилди.
Ишчи гуруҳ муассасаларнинг ҳолати ва у ердаги жазо ўтаётган шахслар ҳолидан хабар олди.
Гуруҳ таркибида омбудсман вакиллари, Ўзбекистон инсон ҳуқуқлари «Эзгулик» жамияти ҳамда «Ҳуқуқий таянч» жамоат бирлашмаси вакиллари (фақат Зарафшондаги колонияда – «Эзгулик») бор эди.
Учрашувларда иштирок этган «Эзгулик» жамияти раиси ўринбосари Бекзод Нурматовга кўра, Зарафшондаги колония 2200 кишига мўлжалланган. Ҳозирда бу ерда 684 нафар маҳкум жазо муддатларини ўтамоқда, уларнинг 27 таси диний радикал оқимларга мансубликда айбланган. Мазкур шаҳардаги 36-сонли манзил колония эса 450 кишини сиғдира олади. Бу ерда 272 нафар маҳкум бор.
«Навоий вилоятининг Қизилтепа колонияси эса ўз бағридан Халқ артисти Озодбек Назарбеков, таниқли журналист Хайрулла Ҳамидовларни чиқарган, ҳозирда «халқ орасида машҳур бўлган» пирамидачи Аҳмадбойни сақлаётган маскан. Бу колония 2200 кишига мўлжалланган, айни пайтда эса 1123 нафар маҳбус бор. Уларнинг 62 нафари диний экстремистик оқимларга мансуб», – дейилади «Эзгулик» жамияти матбуот хизмати хабарида.
Қаттиқ тартибли бу колонияда таниқли блогер Фозилхўжа Орифхўжаев билан учрашилди. «Қамоқхона шароитидан шикоятим йўқ. Пластик цехида уста бўлиб ишлаяпман. Аммо суд ҳукмидан норозиман ва мен қамалишим керакмасди» – дейди Фозилхўжа.
Колония маъмуриятига кўра, бу ерга диний уламо Аброр Мухтор Алий келиб маърузалар қилади. Пирамидачи Аҳмадбой эса «сангород»да соғлиғини тикламоқда.
Навоий шаҳридаги 12-сонли қаттиқ тартибли колония эса 1600 кишилик, бу ерда ҳозирча 1070 маҳкум бор. Ҳозирда бу ерда 1146 нафар маҳкум бор. Уларнинг 60 таси радикал оқимлар фаоллари бўлган. Блогер Акмал Шарипов ҳам шу ерда экан. Оиласи билан узоқ муддатли учрашувда экани сабабли у билан учрашишнинг имкони бўлмаган. У яқин 2 ой ичида озодликка чиқарилиши мумкин экан.
Мазкур шаҳардаги 4-сонли умумий тартибли колонияга эса 1800 киши сиғади. Колонияда блогер Отабек Сатторий жазо муддатини ўтамоқда. У қурилиш молларига нақш босувчи цехда оператор. «Эзгулик» фаоли билан учрашувда ўзининг ноҳақ қамалгани, судларнинг адолатсизлигини таъкидлаган блогер оилада ёлғиз боқувчи эканини, озодликка чиқиш учун курашаётгани ва фақат президент Мирзиёевга ишонишини таъкидлаган.
«Мониторинг натижаларига кўра, қамоқхоналарнинг моддий техник базасини мустаҳкамлаш, уларнинг ош-овқати сифатини яхшилашга уринишмоқда. Шикоятларнинг асосий қисми суд ҳукмларининг адолатсизлигидан. Энг ёмон кўрсаткич — маҳкумларнинг катта қисмини ёшларнинг ташкил қилишидир.
Қийноқ ва ноинсоний муомала турлари бўйича ҳозирча шикоят йўқ. Аммо айрим маҳкумлар бундай ҳолатларни Бухородаги колонияларда, Қаршидаги жазони ижро этиш муассасаларида эшитилаётгани ҳақида гапиришган. ‘Кўрамиз, у томонларга ҳам сафар режалаштириш ниятимиз бор’, дейди гуруҳ аъзолари.
‘Эзгулик’ жазони ижро этиш муассасаларига сафарни ташкил қилган Ўзбекистон Республикаси Олий Мажлисининг инсон ҳуқуқлари вакили идорасига миннатдорчилик билдиради», – дейилади хабарда.
Ушбу хабар Ўзбекистон инсон ҳуқуқлари «Эзгулик» жамияти матбуот хизматининг Facebook’даги саҳифасидан ўчириб ташланди. Лекин, жамият матбуот хизмати юқоридаги маълумотларни «Gazeta.uz» нашрига тақдим этган.
2018 йилнинг 21 февраль куни Жиноят ишлари бўйича Тошкент вилоят судида Аҳмадбой ва унинг шерикларига нисбатан ҳукм эълон қилинади.
Ўзбекистон Республикаси Жиноят кодексининг 168-моддаси (фирибгарлик), 188-моддаси (ноқонуний тадбиркорлик фаолияти), 189-моддаси (савдо ёки хизмат кўрсатиш қоидаларини бузиш), 190-моддаси (фаолият билан лицензиясиз шуғулланиш), 25-моддаси (жиноятга тайёргарлик кўриш ва жиноят содир этишга суиқасд қилиш) орқали 211-моддаси (пора бериш) ва 243-моддаси (жиноий фаолиятдан олинган даромадларни легаллаштириш)да кўзда тутилган жиноятларни содир этишда айбланган Аҳмадбой, Олмос Қўчқоров, Иззатилла Иброҳимов, Муроджон Турсунбоев, Ойбек Турсунбоев, Азизжон Турдиев ва Рашид Исмоиловларга нисбатан суд ҳукми ўқилади.
Мавзуга доир: «Аҳмадбой васвасаси» — Ўзбекистондаги энг шов-шувли молиявий пирамида асосчиси Аҳмаджон Турсунбоев фаолияти хронологияси
Жиноят ишлари бўйича Музработ туман судининг 2021 йил 10 майдаги ҳукмига кўра, Отабек Сатторий Жиноят кодексининг 139-моддаси (туҳмат) 3-қисми «а», «г» бандлари ва 165-моддаси (товламачилик) 3-қисми «а» бандида назарда тутилган жиноятларни содир этганликда айбли деб топилиб, унга Жиноят кодексининг 57-моддаси (енгилроқ жазо тайинлаш) қўлланиб, 59-моддаси (бир неча жиноят содир этганлик учун жазо тайинлаш) ва 61-моддаси (жазоларни қўшишнинг ҳисоблаш қоидалари)га асосан тайинланган жазоларни қисман қўшиш йўли билан узил-кесил 6 йил 6 ой муддатга озодликдан маҳрум қилиш жазоси тайинланган. 4 май куни бўлиб ўтган суд мажлисида прокурор унга 11 йил қамоқ жазоси тайинланишини сўраганди.
Жиноят ишлари бўйича Самарқанд вилоят суди томонидан 6,5 йиллик қамоқ жазосига ҳукм қилинган блогер Отабек Сатторийнинг иши тўғрисида ҳукм чиқарилган. Унга кўра, Сатторийга нисбатан тайинланган 6 йил 6 ойга озодликдан маҳрум қилиш жазоси ўз кучида қолдирилган.
Изоҳ (0)