“Баъзи директорлар норози бўлди, аммо жавобгарликни зиммага олдим” — Сурхондарё ҳокими

Сурхондарё вилояти ҳокими Улуғбек Қосимов “Дарё” журналисти билан бўлган суҳбатда вилоятдаги умумтаълим мактабларида таълим тизимини қандай қилиб қуйи поғонадан юқори поғонага олиб чиққани ҳақида гапирди.

Ҳамма мактаб директорларини ротация қилдик. Вилоят миқёсида 966 та мактаб бўлса, барча директорларни. Майли, 10-15 фоизини хато ротация қилгандирмиз, адашгандирмиз. Тўлиқ идеал қилиб бўлмайди-ку, унинг иложи йўқ. Зўр мактабда ишлаётган, ҳаммасини йўлга қўйиб олган директорлар норози бўлди. “Нега мен бу мактабга ўтаман? Нима учун бу қолоқ мактабга директор бўлишим керак?” дейишди. Лекин биз тушунтирдик ва қаттиқ турдик. Ҳамма жавобгарликни ўзимга олиб, президентимизга ҳам айрим пайтларда “мана шундай норози бўляпти, лекин мана бундай қилдик”, деб ахборот ҳам бериб турдик, дейди вилоят раҳбари.

Вилоят ҳокимининг айтишича, ҳудудда 966 та мактаб бўлса, 448 таси таъмирдан чиққан.

Вилоятга ҳоким бўлиб келган пайтларимда мактабларга кириб қўрқиб кетганман. Тошкент шаҳрида ишлаб, у ердаги мактаблар билан таққослаганман-да. Мактабларда умуман шароит йўқ эди. Сурхондарё мактабларига бугун киринг. Президентимизга “Ҳурматли Президент, шундай-шундай” деб маълумот берганимиздан кейин дастурларга тушиб, қўшимча маблағлар ажратилди. Бир сўмни 10 сўм қилиб, ҳаммамиз биргалашдик. Тадбиркорлар ўзи ўқиган мактабларини таъмирлаб бергач, бу жуда яхши қизиқиш билан қабул қилинди. Қолганлар ҳам ўшандан ўрнак оляпти. Раҳбарлар ҳам ўзи ўқиган мактабига киряпти. 448 та мактаб капитал таъмирдан чиқди, дейди Улуғбек Қосимов.

Улуғбек Қосимов Саида Мирзиёеванинг Сурхондарё вилоятидаги мактабларга ташриф буюриши мактабларнинг тубдан ўзгаришига туртки берганини таъкидламоқда.

Саида Шавкатовнанинг бир келиб кетганлари билан ўша мактаб янги бўлди, одамлар хурсанд. Ўша расмдаги мактаб. Ҳамма кўрган уни. Худди шунақа мактаблар кўп эди. Бу ҳақда Саида Шавкатовнага ахборот бергандим. Кейин ўзлари ҳам “Эҳҳе, мана бунақа мактаблар билан биз қандай қилиб таълим-тарбияни сўраймиз? Таълим сифатини қандай сўраймиз?” деб ҳайрон қолдилар-да. Айтдим, йўқ, Саида Шавкатовна, биз мана шундай дастурлар билан кетяпмиз дедим. Одамда хоҳиш бўлса бор-ку, кўз қўрқоқ, қўл ботир дейди-ку. Имконият топилар экан. Мен битта нарсага амин бўлдим, президентимиз бекорга айтмас эканлар мактаб чиройли бўлса, сифати ҳам ўзгарар экан. Ўқитувчининг ҳам кайфияти ўзгаради. Иш жойига нисбатан меҳри бўлади. Бугун фарзандларимизнинг тарбиясига, таълимига қаттиқ эътибор беришимиз керак. Сурхондарёликларнинг ҳаммаси болаларини ўқитиши керак. Ягона бизнинг ютуғимиз шу бўлади, дейди ҳоким.