Тошкент шаҳрининг Яккасарой туманидаги рассомчилик мактаби ўқитувчиси дарс пайтида ўқувчи қизга шилқимлик қилгани учун 5 суткага қамалди. Бу ҳақда “Дарё”га Тошкент шаҳар судлари ахборот хизмати маълума қилди.
2025 йил 3 март куни Тошкент шаҳар жиноят ишлари бўйича Яккасарой туман судида ўқитувчининг қилмиши кўриб чиқилган.
Маълум бўлишича, 25 ёшли ўқитувчи М.Д. 2025 йил 16 февраль куни соат 13:30 да рассомчилик тўгараги мактабида таҳсил олувчи Б.А.нинг қадди-қоматини тавсифлаб, унинг елкаларини ушлаган ва уқалаган. Шунингдек, қўлларини силаб, қучоқлаб, ўқувчи қизга шаҳвоний шилқимлик қилган.
Суд мажлисида ҳуқуқбузар М.Д. айбига тўлиқ иқрорлик билдириб, рассомчилик тўгараги мактабида ўқитувчи эканлигини, Б.А. ўқувичиси бўлишини, 16 февраль куни дарс давомида ўқувчиларга берилган топшириқни ўқувчи қиз яхши бажаргани учун уни қучоқлаганини гапириб берган. Шунингдек, бу қилмишидан афсусдалигини, ҳолат такрорланмаслигини айтиб, енгиллик сўраган.
Судда сўз олган жабрланувчи, ўқувчи қизнинг онаси эса қизи ўқитувчиси дарс вақтида унга шилқимлик қилганини айтгани учун 102 га қўнғироқ қилиб, ўқитувчига чора кўришларини сўраганини айтди. У суддан ҳам ўқитувчига қонуний чора кўришни сўради.
Судья Жасур Ҳожимуродов ишни кўриб чиқиб, далиллар билан танишиб, ўқитувчини Маъмурий жавобгарлик тўғрисидаги кодекснинг 41-1-моддаси 1-қисми билан (шаҳвоний шилқимлик қилиш) айбдор деб топиб, унга нисбатан 5 сутка маъмурий қамоқ жазосини тайинлади. Жазони ўташ муддати 2025 йилнинг 3 март кунидан бошлаб ҳисобланиши белгиланди.
Изоҳ (0)