Судьялар олий кенгаши ҳузуридаги Судьялар олий мактаби негизида Ўзбекистон Одил судлов академияси ташкил этилади. Бу ҳақда президентнинг “Одил судлов соҳасида юқори малакали кадрлар тайёрлаш тизимини тубдан такомиллаштириш чора-тадбирлари тўғрисида”ги фармонида белгиланди.
Фармонга кўра, 2025 йил 1 октябрдан судьялик лавозимларига номзодларни тайёрлаш академиянинг 6 ойлик касбий қайта тайёрлаш курсларида давлат гранти асосида ташкил этилади. Курсларга қабул қилинган шахслар уларнинг эгаллаган лавозими бутун ўқиш даври мобайнида сақланади. Ўқиш даврида тингловчиларга судья ёрдамчисининг 1 ойлик меҳнатига ҳақ тўлаш фонди миқдорида ҳар ойда стипендия тўланади.
Курсга қабул қилиш қуйидагилардан иборат танлов асосида амалга оширилади:
- психология,
- чет тиллари;
- суд ихтисослиги бўйича тест синовлари;
- ёзма имтиҳон;
- якка тартибдаги суҳбат.
Якуний аттестация имтиҳони натижаларига кўра, курсни тамомлаган битирувчилар аризасига асосан бўш судьялик лавозимларига ўтказиладиган танловларда иштирок этади.
Ўқиш дастурини ўзлаштирмаган ва якуний аттестация имтиҳонидан ўтмаган тингловчилар, бўш судьялик лавозимига 3 йилгача муддатда ариза топширмаган ёки таклиф этилган судьялик лавозимини эгаллашни рад этган битирувчилар олинган стипендия суммасини тўлиқ миқдорда қоплаб беради.
Судья ва суд аппарати ходимларининг мажбурий малакасини оширишнинг қуйидаги тартиби жорий этилади:
- 5 йилга тайинланган судьялар — ҳар 2 йилда,
- 10 йилга тайинланган судьялар — ҳар 3 йилда 2 ҳафтадан кам бўлмаган;
- Олий суд судьялари, суд раислари ва раис ўринбосарлари, шунингдек, муддатсиз даврга тайинланган судьялар — ҳар 3 йилда 1 ҳафтадан кам бўлмаган;
- фаолият самарадорлиги рейтингининг паст кўрсаткичларига эга судьялар — навбатдан ташқари 2 ҳафтадан кам бўлмаган;
- суд аппарати ходимлари — ҳар 2 йилда 1 ҳафтадан кам бўлмаган малака ошириш курсларида ўқитилади.
Амалдаги судьялар учун мураккаб тоифадаги ишлар бўйича малака ошириш курслари ташкил этилади. Раҳбарлик лавозимларига, қоида тариқасида, фақат раҳбар кадрларни қайта тайёрлаш курсларини муваффақиятли тамомлаган судьялар тайинланади.
Академияда 2026/27-ўқув йилидан “Суд фаолияти” мутахассислиги бўйича магистратура дастури асосида ўқитиш ташкил этилади.
21 август куни Шавкат Мирзиёевга қилинган тақдимотда Одил судлов академиясини ташкил этиш концепцияси тақдим қилинганди.
Изоҳ (0)