Февраль ойида Жиззахда Вақтинча сақлаш ҳибсхонаси бошлиғи 5 минг доллар пора олаётганида ушлангани ҳақида хабар берилган эди. Мазкур иш жиноят ишлари бўйича Фориш тумани судида кўриб чиқилди.
Шароф Рашидов тумани Ички ишлар бўлими Вақтинча сақлаш ҳибсхонаси бошлиғи айблов эълон қилиниб, мазкур ҳибсхонада сақланаётган шахсга нисбатан жиноят ишини кўриб чиқаётган судья томонидан озодликдан маҳрум қилиш билан боғлиқ бўлмаган жазо тайинланишида ёрдам бериши эвазига 10 минг доллар талаб қилган.
Давлат хавфсизлик хизмати ходимлари томонидан ўтказилган тезкор тадбирда у сўралган пул маблағидан 5 минг долларни олган вақтида ушланган.
Терговга қадар текширув давомида, мазкур мансабдор шахс муқаддам ўз хизмат мавқейидан фойдаланиб, ҳибсхонада сақланаётган ушбу фуқаронинг оила-аъзолари билан учрашиши ҳамда уйидан олиб келинган озиқ-овқат маҳсулотларининг киритилиши учун рухсат бериш эвазига 400 доллар олгани ҳам маълум бўлган.
Суд ҳукмига кўра, айбланувчи Жиноят кодексининг 59-моддаси (бир неча жиноят содир этганлик учун жазо тайинлаш) ва 61-моддаси (жазоларни қўшишнинг ҳисоблаш қоидалари) билан 2 йил 6 ой ИИВ тизимида мансабдор ва моддий жавобгарлик лавозимларида ишлаш ҳуқуқидан маҳрум этилган.
Бундан ташқари, унга 6 йил-у 6 ой озодликдан маҳрум қилиш жазоси берилган.
Изоҳ (0)