Тошкентда жисмонан бақувват бир нечта шахсни ўз атрофига тўплаб, ўлдириш ёки зўрлик ишлатиш билан қўрқитиш каби жиноятларни содир қилганликда айбланаётган Саидазиз Саидалиев ва 28 нафар шахсга нисбатан суд иши бошланди. Бу ҳақда судда қатнашган “Дарё” журналисти хабар берди.
1987 йил Тошкент шаҳрида туғилган Саидазиз Саидалиев қарздорлик ва бошқа муаммолари бўлган шахслар масаласини қонунни четлаб ўтган ҳолда ҳал қилиб бериши эвазига моддий жиҳатдан манфаатдор бўлиб келган. Шу сабаб у фуқароларга таҳдид қилиб, пул маблағларини ноқонуний қўлга киритган.
Жиноят ишлари бўйича Юнусобод туман судида суд раиси Мурод Мирзажонов раислигида бошланган мажлисда дастлаб 29 нафар судланувчининг шахси ва аҳволига аниқлик киритилди.
Гуруҳнинг асосий аъзоси Саидазиз Саидалиев Жиноят кодексининг 165-моддаси 3-қисми “а” ва “в” банди (товламачилик), 168-моддаси 4-қисми “а” ва “в” банди (фирибгарлик), 211-моддаси 3-қисми “а” ва “б” банди (пора бериш), 242-моддаси 1-қисми (жиноий уюшма ташкил этиш), 243-моддаси (жиноий фаолиятдан олинган даромадларни легаллаштириш), 277-моддаси 2-қисми “б” ва “в” банди (безорилик), 277-моддаси 3-қисми “а” банди (безорилик) билан айбланмоқда.
“Саидазиз медгородок” лақаби билан танилган шахс ва унинг шерикларидан жабрланганлар сони 30 нафардан ортиқ. Улар орасида тадбиркорлар ҳам бор.
Олий суд ахборот хизматининг маълумот беришича, дастлабки тергов органининг айблов хулосасига кўра, судланувчилар — С.Саидалиев, М.Мирходжаев, Ш.Самиев, А.Акрамов, I.Сатвалдиев, Ф.Алимов, Р.Бобоназаров, Л.Шомуродов, Н.Туляганов, Ш.Қуватов, Ғ.Ўринбоев, У.Маҳмудов, А.Нурматов, Б.Эркинов, А.Юлдашев, С.Усмонов, Д.Умирзаков, Т.Абдумаликов, Д.Бадалов, У.Рахимов, Д.Хошаков, З.Қаюмов, Б.Мўминов, Д.Юнусов, Д.Султанов, Б.Самадов, Х.Рискиев, Б.Раҳмонов ва Ё.Сотиволдиев Жиноят кодексининг 112-, 165-, 168-, 182-, 227-, 228-, 229-, 236-, 237-, 238-, 242-, 243-, 277- ва 28,211-моддаларида назарда тутилган жиноятларни содир этганликда айбланмоқда. 28 нафар судланувчига нисбатан қамоққа олиш ва 1 нафарига муносиб хулқ-атворда бўлиш тўғрисида тилхат тарзидаги эҳтиёт чоралари қўлланган. Тасдиқланган айблов хулосасига асосан мазкур жиноят иши доирасида 31 нафар жабрланувчи ва 130 нафар гувоҳ аниқланган.
Судда сўз олган адвокатлар судлов ҳайъатига илтимоснома киритиб, судланувчиларнинг айни пайтда сақланаётган жойини ўзгартириб беришни сўради. Айтилишича, судланувчилар айни пайтда Тошкент шаҳар ИИББ биносидаги вақтинча сақлаш жойларида сақланмоқда.
Айни пайтда судланувчилар сақланаётган жойда на ювинишга шароит бор, на биз адвокатлар билан кўриша олишяпти. Қонунларимизга кўра, адвокат ҳимоя қилаётган инсони билан исталган вақтида кўриша олиши керак. Шунингдек, судланувчилар ҳам суд давомида ҳам муносиб шарт-шароитда сақланишга ҳақли, — деди адвокатлардан бири.
Яна бир адвокат ҳам шундай талаб билан чиқиб, судланувчиларни “Тоштурма”га ўтказишни илтимос қилди. Барча адвокатлар буни қўллаб-қувватлаб, адвокатларнинг умумий талаби сифатида қабул қилинишини сўради. Судья мазкур ҳолатни ўрганиб чиқишини билдирди.
Судья Мирзажонов, шунингдек, ОАВ вакилларига юзланиб, суд тергови давомида қонунга амал қилган ҳолда жараённи ёритиб боришлари кераклигини эслатди. Олдиндан башорат қилмаслик, судланувчиларнинг ҳали айбдор эмаслигини инобатга олиб, айбсизлик презумпсиясига амал қилиниши кераклигини билдирди.
Эслатиб ўтамиз, 2023 йил 2 декабрь куни Тошкент шаҳрида “Саидазиз медгородок” лақаби билан танилган шахс қўлга олингани маълум бўлди. У атрофига жисмонан бақувват шахсларни тўплаб, қарздорлик ва бошқа муаммоларни қонунни четлаб ўтган ҳолда ҳал қилиб бериш билан шуғулланган. 3 декабрь куни эса ҳуқуқ-тартибот идоралари ходимлари “Бахти Ташкентский” лақаби билан танилган Бахтиёр Қудратуллаевни қўлга олди.
Кўп ўтмай Тошкент шаҳрида профилактик тадбир давомида Салимбой номи билан танилган Салим Абдувалиев ҳам ушланди. 1950 йилда туғилган Абдувалиев Салим Киргизбаевич (248-модда 1-қисми, ўқотар қуролни қонунга хилоф равишда сақлаш) гумон қилинувчи тарзида жалб этилган. Март охирларида унга 6 йил муддатга озодликдан маҳрум қилиш жазоси тайинлангани маълум бўлди.
Изоҳ (0)