Тунисда президентликка номзодларнинг беш нафари қамоққа олинди

Reuters хабарига кўра, Тунис президентлигига номзод бўлган беш нафар вакил қамоқ жазосига ҳукм қилинган. Энди улар мамлакатда октябрга белгиланган президентлик сайловларида қатнаша олмайди. Шу куни амалдаги президент Кайс Саид давлат раҳбари лавозимига номзод сифатида расман рўйхатга олинди.

Пойтахт судларидан бири тунислик таниқли сиёсатчи Абдуллатиф Макки, фаол Низар Чаари, судья Мурод Масудий ва президентликка яна бир эҳтимолий номзод Адел Дуга ҳукм чиқарди. Уларнинг барчаси сайловчиларга пора берганликда айбланиб, саккиз ойлик қамоқ жазосига ҳукм қилинган. Шунингдек, адвокат ва ашаддий мухолифатчи Абир Муссий икки йиллик қамоқ жазосига ҳукм қилинди. У сайлов комиссиясини ҳақорат қилишда айбланган.

Мухолифат партиялари ва инсон ҳуқуқлари гуруҳлари ҳукумат шу тариқа Туниснинг амалдаги президенти Кайс Саиднинг барча жиддий рақибларини йўқ қилаётганини даъво қилмоқда. Ўтган ой суд президентликка яна бир потенциал номзод, амалдаги президентнинг ашаддий танқидчиси Лутфий Мирийийни сайловчиларга пора берганликда айблаб, саккиз ойлик қамоқ жазосига ҳукм қилди. Шунингдек, суд унга президентлик сайловларида иштирок этишни тақиқлаган.