Andijon viloyati jinoyat ishlari bo‘yicha Xonobod shahar sudi raisi 30 ming dollar bilan ushlangani haqida xabarlar tarqaldi. Sudyalar oliy kengashi bunga munosabat bildirdi.
Unda keltirilishicha, 12-may kuni Sudyalar oliy kengashining yig‘ilishi bo‘lib o‘tdi. Unda bosh prokurorning Andijon viloyati jinoyat ishlari bo‘yicha Xonobod shahar sudi raisi Y.E.ni Jinoyat kodeksining 168 (firibgarlik) va 28,211-moddalari (pora berish) tegishli qismi bilan jinoiy javobgarlikka tortishga oid taqdimnomasi muhokama qilindi.
Yakunda kengash xulosasi bilan Y.E.ni jinoiy javobgarlikka tortishga rozilik berildi va uning sudyalik vakolati to‘xtatildi.
“Tergov siri va aybsizlik prezumpsiyasi talablaridan kelib chiqib, boshqa tafsilotlar oshkor qilinmaydi”, deyiladi xabarda.
Ta’kidlanishicha, ijtimoiy tarmoqlardagi aksariyat manbalarda tarqatilayotgan shu mavzudagi xabarlar bo‘rttirilgan bo‘lib, barcha holatlarga tergov yo‘li bilan aniqlik kiritiladi.
Y.E. Xonobod shahar sudining raisi lavozimiga 2024-yilning dekabrida besh yil muddatga tayinlangandi.
Aprel oyining oxirlarida Toshkent shahridagi kafelarning biridan mast holda chiqqan va mashina o‘g‘irlashda gumonlangan Mirobod tuman sudi sudyasi vakolati muddatidan avval tugatilgandi. Unga nisbatan jinoyat ishi qo‘zg‘atilgan.
Izoh (0)