Туркияда Истанбул мэри Акрам Имомўғли ҳибсга олиниши фонида ўтказилаётган норозилик намойишлари ноқонуний бўлиб, ҳақиқий кўча террори ҳисобланади. Шу сабабли ҳукумат мухолифатнинг тартибсизликларга қилинган масъулиятсиз чақириқларига эътиборсиз қолмайди. Бу ҳақда 21 март куни мамлакат президенти Ражаб Тоййиб Эрдўғон маълум қилди.
Давлат раҳбарининг таъкидлашича, Туркияни террорга солиш ва фуқаролар тинчлигини бузишга қаратилган барча уринишларга чек қўйилади, чунки ҳеч ким халқ барқарорлигига тажовуз қилишга ҳақли эмас.
“Маргинал гуруҳларга эргашиб, полициямизга ҳужум қилиб, судья ва прокурорларимизга таҳдид солиб, демократия ва миллий иродага қарши чиқиб, ноқонуний ва нодемократик воситаларга мурожаат қилиб, ҳеч нарсага эриша олмаймиз. Туркия кўчада топилган мамлакат эмас. Туркия кўча террорига бўйсунмайди”, дея Туркия раҳбари сўзларини келтиради TRT Haber.
Эрдўғоннинг қўшимча қилишича, мухолифатдаги Туркия Халқ Республикаси партияси (XRP) раҳбари Ўзгур Ўзелнинг кўчаларга чиқишга чақириқлари мамлакат халқига зарар етказишга қаратилган боши берк йўлдир.
Изоҳ (0)