Тошкент вилоятида 2 гектар суғориладиган ерни 500 минг долларга расмийлаштириб беришни ваъда қилган жамият раҳбари ушланди

Давлат хавфсизлик хизмати Тошкент, Навоий ва Самарқанд вилоятларида ер майдонларининг ноқонуний сотилишига чек қўйди, деб хабар беради ЎзА.

Хусусан, ДХХнинг Тошкент вилояти бўйича бошқармаси ҳамда Иқтисодий жиноятларга қарши курашиш департаментининг ҳудудий бошқармаси ходимлари ҳамкорлигида тезкор тадбир ўтказилган. Тадбирда Нурафшон шаҳридаги чорвачиликка ихтисослашган масъулияти чекланган жамият таъсисчиси мазкур МЧЖнинг 2 гектар суғориладиган ер майдонини 500 минг АҚШ доллари эвазига харидор номига расмийлаштириб беришни ваъда қилгани аниқланган. У олдиндан келишилган пулнинг 140 минг долларини олган вақтида ушланган.

Тошкент вилоятида кузатилган яна бир ҳолатда Қибрай туманидаги масъулияти чекланган жамият бошқарувчиси мазкур МЧЖга 46 йил муддатга ижара асосида фойдаланиш учун берилган 91 гектар ер майдонининг 60 гектарини харидор номига расмийлаштириб бериш эвазига 60 минг доллари талаб қилиб, олдиндан 30 минг доллар олган вақтида ушланган.

Кармана туманида яшовчи тадбиркор эса ўзига давлат-хусусий шерикчилик шартлари асосида сунъий қопламали футбол майдончаси ва ёрдамчи бино объектини қуриши учун берилган 9,9 сотих ер майдонини харидорга 50 минг долларга сотишга келишиб, олдиндан 30 минг доллар олган вақтида ДХХ Навоий вилояти бўйича бошқармаси, вилоят прокуратураси ҳамда ички ишлар бошқармаси ходимлари томонидан қўлга олинган.

ДХХ Самарқанд вилояти бўйича бошқармаси ва департаментнинг ҳудудий бошқармаси ходимлари ҳамкорлигида ўтказилган тезкор тадбирда Самарқанд шаҳрида яшовчи 42 ёшли шахс ўзига иссиқхона ташкил этиши учун Самарқанд тумани ҳудудидан ажратиб берилган 90 сотих ер майдонини 40 минг долларга сотишга келишиб, олдиндан 20 минг доллар олган вақтида ушланган.

Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилган.

Аввалроқ ДХХ Тошкент туманида ҳоким ёрдамчисини қўлга олгани, Оҳангарон ҳокимлиги ходими 20 минг доллар пора билан ушлангани, Қўқон шаҳар ҳокимининг 10 минг доллар пора олган биринчи ўринбосари 5 ярим йилга қамалгани тўғрисида хабар берилганди.