“Тўққиз ой тоза ишладим, ҳеч қандай илтимосни бажармадим”. Судьяликдан ноҳақ кетказилганини айтаётган собиқ қози 

“Дарё”га собиқ судьялардан бирининг мурожаати келиб тушди. Судьялар Олий мактабини тамомлаган ва тўққиз ой фаолият юритган собиқ қози Мамаджон Йўлдошевнинг айтишича, у укасининг ҳимоясига киришгани ва бу йўлда ҳамкасбларидан бирининг қонунга хилоф ҳаракатини очишга урингани учун “йўлдан олиб ташланган”.

Мен Мамаджон Йўлдошев Жиззах туманлараро иқтисодий судининг собиқ судьясиман. Судьялар олий кенгаши масъуллари иштирокидаги матбуот анжуманига бориб, ўзим билан боғлиқ ҳолатга жавоб олишга уриндим. Минг афсуски, ўша матбуот анжуманига мени киритишмади. 2024 йилнинг 15 май куни ваколатим тугатилган. Ўша кундан бери ҳуқуқимни ҳимоя қилиш учун кўплаб масъулларга мурожаат қиляпман. Аммо чуқур ўрганилмаган, бир-бирига ўхшаш жавоблар билан кифояланмоқдаман, дейди сўзини бошлаган собиқ қози. 

Мамаджон Йўлдошевнинг маълум қилишича, у оилада тўнғич фарзанд бўлгани, онаси ёлғиз экани ва шу сабабдан ҳам судда укасининг ҳимоясига киришгани учун судьялардан бирининг жиноят ишидаги иштирокини фош қилган. Бу эса унга қимматга тушган. 

Укам пул олди-бердиси билан боғлиқ жиноятда айбланаётганди. Вазиятни билганимдан сўнг, бу ерда укамга нисбатан ноҳақлик бўлаётганини, шунингдек, Наманган вилоятида айнан шу ишда укамга адвокат бўлишга уринганларга нисбатан босим бошланганини билиб қолдим. Шунда Тошкент шаҳрида фаолият юритувчи адвокатлар билан шартнома қилиб, Наманган вилоятидаги судда укамни ҳимоя қилишга киришдим. Шу сабаб йўлга отландим ва ўзим фаолият юритувчи вилоят суди раисининг ўринбосаридан телефон орқали рухсат олиб, бошқа вилоятга кетдим. Сал аввалги йиғилишларда гарчи судьяларнинг бошқа вилоятга чиқиши учун вилоят суди раисидан ёзма тарзда рухсат олиши кераклиги тўғрисидаги талаб оғзаки, жоиз бўлганда, имконсиз пайтларда телефон орқали рухсат олишимиз ҳам мумкинлиги айтилгани учун шу усулда рухсат олдим. Укамнинг ҳимояси учун шошилаётганим шунга мажбур қилди. Хуллас, Чортоқ туманидаги судда адвокат билан бирга укамни ҳимоя қилдик ва унга нисбатан бўлаётган адолатсизликни қонуний исботлаб бердик.

Бу ишларни битириш давомида вилоятда фаолият юритувчи судьялардан бирининг ҳам бу ишда алоқаси борлиги, тергов ҳаракатларига аралашгани билан боғлиқ ҳолатларга гувоҳ бўлдим ва ҳужжатлар орқали буни исботладим. Шу сабаб ўша ҳамкасбимга қўнғироқ қилиб, тергов ишларига аралашгани етарли эканини, бундан кейинги ишларга аралашмаслиги кераклиги ҳақида огоҳлантирдим. Ҳамкасбим бу ҳақда юқори турувчи ташкилотимизга билдирги беришини айтди. Шунда ўзининг номидан пора олинаётганини эшитган вақтида ҳам айнан шундай иш тутиши лозим бўлганини, бироқ у қонуний билдирги ёзмаганини эслатдим. Ва судьялик ваколатидан четга чиққанини айтдим. Хуллас, бу эслатма ва ҳамкасбимнинг иддаоси юқори ташкилотимизга етиб борди ва мени йўлдан олиб ташлашга сабаб бўлган омиллардан бири бўлди, дейди суҳбатдош. 

Собиқ қозининг тушунтириш беришича, укаси билан боғлиқ жиноят ишида Наманган вилоятининг Чортоқ туманида фаолият юритувчи судья номидан пора олинаётгани ва бу ҳақда у судьяга унга аввалдан таниш бўлган инсон орқали маълумот борган.

Бундай пайтда судья илгари бирга ишлаган танишларига қўнғироқ қилиб, “тадбир қилиб беринг, менинг номимдан пора олинаётган экан”, дейиши керакмасди. Қонуний билдирги ёзиши лозим эди. Чортоқ туманида фаолият юритувчи судья бундай қилмади. У аввал бирга ишлаган таниши, Иқтисодий жиноятларга қарши курашиш департаментининг Наманган вилояти бошқармаси бошлиғи ўринбосарига қўнғироқ қилиб, унинг номидан пора олинаётганини, шунга қарши тадбир қилиб беришини ва мурожаатчини юборишини айтган. Бу аслида хато. Мен шуни очишга уриндим. Қолаверса бу ишда яна бир аёл бўлган. У эса нафақат судья, вилоятдаги барча ҳуқуқни муҳофаза қилувчи ташкилот вакиллари томонидан яширилмоқда. Энг қизиғи, шахси очиқланмаётган ва барча ишда сувдан қуруқ олиб чиқилаётган аёл мен билан қарама-қаршиликка борган ва шу ишда кўриниш берган судьянинг таниши бўлган. Бу судья аввалроқ шу аёл билан боғлиқ ишни кўриб чиққан ва уни даъвогар сифатида қўллаб-қувватлаган. Ҳатто яқин муносабатда бўлган, дейди мурожаатчи судья. 

Собиқ қозининг қўшимча қилишича, Чортоқ туманидаги ҳамкасбининг кирдикорларини фош этишга уриниши укаси билан боғлиқ суд ишини кўриб чиққан судьянинг ҳам унга қарши билдирги беришига сабаб бўлган. 

Укам билан боғлиқ суд ишини кўриб чиққан судья менинг устимдан билдирги ёзиб, судда судья эканимни яширганимни, судьялар Одоб-ахлоқ кодексига риоя қилмаганимни айтган. Ҳолбуки, у судда менга ким бўлиб ишлайсиз, деган саволни бермай, ўз ишига эътиборсизлик қилган. Энг қизиғи, биз оилавий, онамнинг номидан судга аввалроқ киритган аризамизда айнан менинг судья бўлиб ишлашимни ёзганмиз. Бу аризани судья ўқиб чиқмаган бўлиши мумкин эмас, боиси бу иш ҳужжатларида тикилган бўлган. Шу гапимни исботлаш учун ўша кунги суд жараёни видеотасвирга тушганини, ўша тасвирларни кўриш кифоя эканини айтиб, такрор-такрор мурожаат қиляпман. Лекин мени эшитиши керак бўлган масъуллар қулоғим кар, қўзим кўр деган мазмунда иш юритмоқда, дейди судья. 

Батафсил воқеани “Дарё”нинг YouTube каналидаги видео орқали кўришингиз мумкин бўлади.