Андижон вилояти жиноят ишлари бўйича Хонобод шаҳар суди раиси 30 минг доллар билан ушлангани ҳақида хабарлар тарқалди. Судьялар олий кенгаши бунга муносабат билдирди.
Унда келтирилишича, 12 май куни Судьялар олий кенгашининг йиғилиши бўлиб ўтди. Унда бош прокурорнинг Андижон вилояти жиноят ишлари бўйича Хонобод шаҳар суди раиси Ю.Э.ни Жиноят кодексининг 168 (фирибгарлик) ва 28,211-моддалари (пора бериш) тегишли қисми билан жиноий жавобгарликка тортишга оид тақдимномаси муҳокама қилинди.
Якунда кенгаш хулосаси билан Ю.Э.ни жиноий жавобгарликка тортишга розилик берилди ва унинг судьялик ваколати тўхтатилди.
“Тергов сири ва айбсизлик презумпсияси талабларидан келиб чиқиб, бошқа тафсилотлар ошкор қилинмайди”, дейилади хабарда.
Таъкидланишича, ижтимоий тармоқлардаги аксарият манбаларда тарқатилаётган шу мавзудаги хабарлар бўрттирилган бўлиб, барча ҳолатларга тергов йўли билан аниқлик киритилади.
Ю.Э. Хонобод шаҳар судининг раиси лавозимига 2024 йилнинг декабрида беш йил муддатга тайинланганди.
Апрель ойининг охирларида Тошкент шаҳридаги кафеларнинг биридан маст ҳолда чиққан ва машина ўғирлашда гумонланган Миробод туман суди судьяси ваколати муддатидан аввал тугатилганди. Унга нисбатан жиноят иши қўзғатилган.
Изоҳ (0)