Иккинчи жаҳон уруши қатнашчиси Рўзибой бобо Сатторовнинг истаги амалга ошди, деб хабар бермоқда Қашқадарё вилояти ҳокимлиги матбуот хизмати.
Куни кеча вилоят ҳокими Муроджон Азимов президентнинг табригини ўқиб эшиттириш учун Ўзбекистондаги энг кекса Иккинчи жаҳон уруши қатнашчиси хонадонига ташриф буюрган эди. Қамашилик Рўзибой бобо Сатторов 115 ёшни қарши олган.
Бугун, 10 май куни эса Иккинчи жаҳон уруши қатнашчиси Рўзибой бобо Сатторовнинг истаги амалга ошиб, президент юборган махсус самолётда парвозни амалга оширди.
Маълумот учун, Иккинчи жаҳон уруши йилларида Қашқадарё вилоятидан 47 051 нафар ўғлонлар фронтга жўнатилган. Уларнинг 24 974 нафардан ортиғи жанг майдонларида ҳалок бўлган.
Бугунги кунда вилоят бўйлаб тинч ва осуда ҳаёт кечираётган 3 нафар уруш қатнашчиларига ҳурмат ва эҳтиром кўрсатилмоқда, шунингдек, жанг-у жадалларда ҳалок бўлганлар хотираси эъзозланмоқда.
Хусусан, Иккинчи жаҳон уруши фахрийси, 115 ёшли (урушга қатнашганлар ичида энг ёши улуғи) Рўзибой бобо Сатторов ҳисобланади.
Президентнинг 19 февралдаги қарорига мувофиқ, уруш ва меҳнат фахрийларига муносиб ҳурмат кўрсатилмоқда. Иккинчи жаҳон уруши қатнашчилари ва ногиронларига 10 минг АҚШ доллари миқдорида, ушбу тоифага тенглаштирилган шахсларга 25 миллион сўм, меҳнат фронти қатнашчиларига 3 миллион сўмдан бир марталик пул мукофотлари берилмоқда. Кўплаб муҳтарам нуронийларга “Иккинчи жаҳон урушидаги ғалабанинг 80 йиллиги” юбилей медаллари топширилмоқда.
Уруш фахрийлари ва ногиронлари учун тиббий ва ижтимоий хизматлар, жумладан, патронаж хизмати кўрсатилмоқда. Улар ўз хоҳишларига кўра санаторийларда даволанмоқда.
Тегишли вазирлик, идора ва ташкилотлар, ҳарбий қисмлар раҳбарлари иштирокида уруш ва меҳнат фахрийлари, мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилувчи органлар ходимларининг оила аъзоларининг ҳолидан хабар олиниб, юмушларига ёрдамлашилмоқда.
Изоҳ (0)