Душанбеда яшовчи 1941—1945 йиллардаги Иккинчи жаҳон уруши қатнашчилари ва ногиронларининг ҳар бирига 10 минг сомонийдан (7 майдаги курс бўйича тахминан 11,6 миллион сўмдан) пул ажратилади. Бу ҳақда Душанбе шаҳар мэрияси хабар берди.
Айни пайтда Душанбе шаҳрида атиги 3 нафар Иккинчи жаҳон уруши қатнашчилари қолган. Сўғд вилоятида эса уруш қатнашчиларининг ҳар бирига қарийб 7 минг сомоний (8 миллион сўмдан зиёд) миқдорида пул мукофоти берилади. Бу йил уруш қаҳрамонларига ёрдам бериш учун Сўғд вилояти ҳокимлиги томонидан жами 306 минг сомоний (355 миллион сўм) ажратилган.
30 апрель ҳолатига кўра, Тожикистонда 24 нафар Иккинчи жаҳон уруши қатнашчиси қолган. Республика уруш ва меҳнат фахрийлари кенгаши ўтган йили 43 нафар фахрий борлигини маълум қилган. 19 йил давомида 9875 нафар уруш фахрийси оламдан ўтди.
Бу йил Тожикистонда 9 май Ғалаба кунини нишонлашга бағишланган ҳарбий парад ўтказилмайди. Бу ҳақда Мудофаа вазирлиги матбуот котиби Фаридун Махмадалиев маълум қилган. У тадбирни бекор қилиш сабабларини айтмаган. Шунингдек, “Ўлмас полк” юриши ўтказилиши ёки ўтказилмаслиги ҳам ҳозирча маълум эмас.
Изоҳ (0)