Қашқадарё ва Сурхондарё ҳокимлари уруш қатнашчилари хонадонларида бўлиб, президентнинг махсус тортиғи — 18 миллион сўм пул мукофоти ва қимматбаҳо совғаларни ўз эгаларига топширди.
Сурхондарё вилоят ҳокимлиги ахборот хизмати раҳбари Муродбек Давлатовнинг “Дарё”га билдиришича, Улуғбек Қосимов Хотира ва қадрлаш куни арафасида Қумқўрғон туманида яшовчи 100 ёшли Ҳайит бобо Мусаев хонадонида бўлиб, байрам билан табриклаган. Давлат раҳбарининг табригини ўқиб эшиттириб, мукофотларни топширган.
“Фахрий нуронийларимиз вилоят ҳокими билан суҳбат давомида ўзларининг уруш йиллари хотиралари, ўтган давр қийинчиликлари, ҳаёт тажрибалари ҳақида сўзлаб беришди. Бугунги дориломон кунларнинг қадрига етиш кераклигини таъкидлаб, президентимиз томонидан Иккинчи жаҳон уруши қатнашчиларига кўрсатилаётган доимий ғамхўрлик учун миннатдорчилик билдирди“, — дейди Муродбек Давлатов.
Қашқадарё вилояти ҳокимлиги ахборот хизмати раҳбари Аҳрор Содиқовнинг “Дарё”га хабар беришича, Муроджон Азимов Нишон туманида яшаётган иккинчи жаҳон уруши қатнашчиси Рўзи бобо Соатов хонадонида бўлиб, президентнинг 9 май – Хотира ва қадрлаш куни муносабати билан уларга йўллаган табригини ўқиб эшиттирган. Давлат раҳбари қимматбаҳо совғаси ва 18 миллион сўм бир марталик пул мукофотини тантанали топширган.
“Байрам муносабати билан уруш фахрийининг хонадонида ташкил этилган тадбирда Жануби-ғарбий махсус ҳарбий округ қўшинлари қўмондони, генерал майор Зайнобиддин Иминов, нуронийлар, туман ҳокими, секторлар раҳбарлари, ҳарбийлар, маҳалла фаоллари ва ёшлар иштирок этди. 99 ёшни қаршилаётган Рўзи бобо уруш хотиралари, очарчилик даврлари, ҳаёт тажрибалари ҳақида сўзлаб, бугунги дориломон кунларнинг қадрига етиш кераклигини такрор-такрор таъкидлади”, — дейди Аҳрор Содиқов.
Қўшимча қилинишича, Сурхондарё ва Қашқадарё вилоятларида мактаб ўқувчилари, МФЙ фаоллари ва жамоатчилик Иккинчи жаҳон урушида вафот этганларни ёд олиб, Мотамсаро она ҳайкали пойига гул қўймоқда. Айни пайтда ҳаёт бўлган уруш қатнашчилари ҳолидан хабар олиб, кўнгил сўралмоқда.
Изоҳ (0)