Кореялик эркаклар сериалларда кўрсатилганидек романтикми?

Жанубий Корея ўзининг ажойиб сериаллари ва мусиқаси билан бутун дунёни ўзига жалб қилиб келмоқда. Агар романтик сериаллар ҳақида гапирадиган бўлсак, ундаги йигитларни икки турга бўлиш мумкин. Биринчиси — меҳрибон ва мулойим. Иккинчиси эса совуққон ва қаттиққўл йигитлар. Улар атрофдагиларга совуқ муносабатда бўлишади, лекин севиб қолгандан сўнг аста-секин юмшоқлашади.

Томошабинлар эса бу қаҳрамонларга ошиқ бўлишади. Хўш, корейс эркаклари ҳақиқий ҳаётда ҳам шундай мулойим ва романтикми? Бу саволга жавоб беришдан олдин, Жанубий Кореядаги гўзаллик тушунчаси ҳақида гаплашайлик.

Корейслар V-шаклли юзларни чиройли деб ҳисоблашади

Кореяда ўткир иякли (V-шаклли) юз жуда чиройли деб ҳисобланади. Кўпчилик Кореяда ингичка ва озғин бўлиш модада эканлигини билади. Бунинг учун мисол тариқасида, уларнинг машҳур актрисалари ва қўшиқчиларига қараш кифоя. Лекин Кореядаги чет элликларнинг ташқи қиёфаси корейс “стандартлари” бўйича баҳоланмайди. Корейс йигитлари чет эллик аёлларда, бурун кўприги баланд бўлганини, қўш қовоқли, оч рангли кўзлар, узун, қалин сочларни ёқтиришади. Агар сиз малласоч бўлсангиз янада яхши.

Корейсларда ўзига хос учрашув ва танишув маданияти мавжуд

Илгари куёв ва келинни ота-оналар танлаган. Кореяда аввалдан севишиб турмуш қуриш маданияти 1960 йилларда пайдо бўлди. Шунинг учун мамлакатда ўзига хос учрашув маданияти пайдо бўлди. 80- ва 90 йилларда ёшлар қандай қилиб хайрихоҳликни намоён қилишни ва кимнидир учрашувга таклиф қилишни билишмаган. Юн Ҳонг ўзининг “Корея тўлқини” китобида ёзганидек, унинг қўшниси ўзига ёққан қизга апелсин совға қилган. Бу мевалар ўша пайтда жуда қиммат эди.

Бундан ташқари йигит қизлар баланд қаватли бинода лифт ёрдамида танишишган. Қизлар турли қаватларда лифт эшиклари олдида туришган. Йигитлар лифтда ҳар бир қаватда тўхтаб, юришган. Лифт эшиклари очилган. Агар йигитга қиз ёқса, у чиқиб, қиз билан суҳбатни бошлаган ва давом этган.

Кореяда йигит ва қиз учун энг осон танишиш усули бу коллежда ўқиб юрган кезларидаги аста-секинлик билан бир-бирини таниб дўстлашиш имконияти бўлган.

Корейс жамияти ҳали ҳам эркак ва аёл орасидаги ёш ва жинсга жиддий қарашади. Аёллар, қоида тариқасида, аёллар билан, эркаклар эса эркаклар билан кўпроқ мулоқот қилишади. Кутилмаган учрашувлар учун имкониятлар деярли кам.

Кореяда яна бир қизиқ нарса бор, у “сеом” (ссеом) деб аталади. Бу йигитнинг қиз билан шунчаки дўстона муносабатда эканлигини ёки у билан ҳали бир-бирини синаш, ўрганиш ва яқиндан танишиш босқичида эканлигини англатади. Лекин бу босқич бир ойдан ошса бу қизга нисбатан қўполлик ҳисобланади.

Камчиқим тўйлар трендда

Илгари тўй ташкиллаштириш агентликлари тўй олдидан суратга олиш, тўй либослари ва бўянишни тақдим этган. Аммо ҳозирда янги турмуш қураётганлар бунинг учун ўнлаб миллион вонни тўлашни хоҳламайдилар. Улар байрамни мустақил равишда режалаштиришади: кийимлар, гулчамбар, аксессуарларни ўзлари истаган сифатдаги ва нархдагисини танлаб ўз тўйларига тайёргарлик кўрадилар.

Севиб қолган корейс романтикка айланади-қўяди

Дорамаларда бизга аёлларга ёқадиган эркак образи кўрсатилади. Шу билан бирга, жамият болалигидан ўғил болаларга қизлар билан қандай муносабатда бўлишни ўргатади. Уларга қизларга ғамхўрлик қилиш ва улар билан гул каби муомала қилиш кераклигини уқтиради. Масалан, агар қиз юпун кийиниб, учрашувга борган бўлса-ю, ҳаво бирдан совиб кетса, йигит дарров ўз кўйлагини ечиб, уни севгилиси елкасига тутади.

Корейс эркаклари севганларига ҳақиқатан ҳам жуда романтик муносабатда бўлишади. Улар кўпинча қизга хатлар ёзади, унинг кундалик ишлари билан қизиқишади, куни қандай ўтганини сўрашади. Буни шунчаки сўрашмайди, балки қиз билан фаол равишда муҳокама қилади.

Аёл турмуш ўртоғининг ота-онасига ҳам ғамхўрлик қилиши лозим

Жамиятда кучли бўлган анъаналарга кўра, турмушга чиққандан кейин аёлнинг ҳаёти кескин ўзгаради. У нафақат уй ишлари ва боласи билан шуғулланиши, балки эрининг ота-онасига ҳам ғамхўрлик қилиши керак. Куёвдан эса аёлининг ота-онасига кўпроқ эътибор беришини кутишмайди. Тўнғич ёки ягона ўғиллар ота-оналарини боқиш учун кўпроқ жавобгарликни ўз зиммаларига олишади. Шунинг учун кўплаб корейс аёллари оилада кенжа фарзанд бўлган эркакларга турмушга чиқишни афзал кўришади.