АҚШ президенти Дональд Трамп йиллик даромади 2,5 миллион доллардан юқори бўлган америкаликлар учун даромад солиғини оширмоқчи. Бу ҳақда Bloomberg агентлиги хабар берди.
Маълумотларга кўра, Трамп аллақачон бу масалани Конгресс вакиллар палатаси спикери Майк Жонсон билан муҳокама қилган.
“Президент таклифи йилига камида 2,5 миллион доллар даромад оладиган шахслар ёки 5 миллион доллар даромад оладиган эр-хотинлар учун 39,6 фоиз миқдорида янги солиқ ставкасини жорий этишни назарда тутади”, дейилади хабарда.
Бундан ташқари, Оқ уй раҳбари тўғридан-тўғри инвестиция фондлари ва венчур компаниялари бошқарувчилари учун солиқ имтиёзларини ҳам бекор қилмоқчи.
Ҳозирда АҚШда энг юқори даромад солиғи ставкаси 37 фоизни ташкил этади.
Агентлик таъкидлашича, солиқнинг оширилиши Трамп маъмуриятига чой пули ва иш вақтидан ташқари ишлаш учун солиқни бекор қилишдан кўрилган йўқотишларни қоплашга ёрдам беради.
Қайд этилишича, солиқларнинг оширилиши ўн йил ичида бюджетга қўшимча 67,3 миллиард доллар жалб қилиш имконини беради.
Бундан олдин Трамп импорт қилинадиган товарларга божлар жорий этилиши АҚШга даромад солиғидан бутунлай воз кечиш имконини бериши мумкинлигини айтган эди.
“Эҳтимол, буларнинг барчаси ишлай бошлагач, бизга даромад солиғи тизими умуман керак бўлмайди”, деган эди у.
Изоҳ (0)