«Қиш сонатаси» ўзбек киноихлосмандлари томонидан такрор-такрор томоша қилинадиган энг севимли сериал дейилса, муболаға бўлмайди. Сериал илк марта эфирга узатилганида айрим йигитлар сочини бош қаҳрамон Жун Сангникига ўхшатиб турмаклагани, қизлар эса Ю Жиндек кийингани сир эмас. «Қиш сонатаси» актёрлари ўтган вақт ичида қанчалик ўзгарди, уларнинг ҳаётида қандай ўзгаришлар кузатилди, қуйида шулар ҳақида сўз юритилади.
«Қиш сонатаси» сериали 2002 йил Жанубий Кореяда режиссёр Юн Сок Хо томонидан суратга олинган. Сериал икки ёшнинг муҳаббати ва айрилиғи ҳақида ҳикоя қилади. Гарчи мавзу доимгидек севгига тақалса-да, режиссёрнинг ёндашуви умуман бошқача. Машҳур пиониначининг ўғли фильм бош қаҳрамони Кан Жунсан Чунчон қишлоқ хўжалигига кўчиб келади. Отасининг ўлими, онаси билан доимий келишмовчиликлар туфайли у ҳамиша ўзини кераксиз деб билади.
Южин ва Санхёк болалигидан бирга ўсган дўстлар. Бир синфда ўқишни бошлаган Жунсан ва Южин орасида тез орада муҳаббат пайдо бўлади, кўп ўтмай Южин Жунсаннинг автоҳалокат туфайли вафот этганини эшитади.
Орадан ўн йил ўтиб, Южин ва Санхёк ўзларининг никоҳ тўйини режалаштиради. Лекин тўсатдан кўчада Жунсанни кўриб қолиши сериал воқеаларини тубдан ўзгартириб юборади. Тез орада яна бир синфдош қиз Чериннинг Франциядан қайтиши муносабати билан синфдошлар учрашув ташкиллаштиради. Учрашувга яқин дўсти билан ташриф буюрган Черин ҳаммани лол қолдиради, сабаби у Жунсанга бир томчи сувдек ўхшаш инсон билан келади. Аммо у АҚШдан келган Ли Минхён эди. Воқеалар ривожи шу тарзда бошланади.
Сериалдаги Жун Санг ва Ю Жин велосипед учадиган хиёбон шу қадар машҳур бўлиб кетдики, ушбу хиёбонга бош қаҳрамонларнинг ҳайкали ҳам ўрнатилган.
Ли Минхён / Кан Жунсан
Пе Ёнжун
1972 йил Жанубий Кореянинг Сеул шаҳрида туғилган. 1994 йилда илк дебютини «PpilKu» фильмида ижро этган. Шундан сўнг бирин-кетин фильм ва сериалларда суратга туша бошлайди. Лекин уни бутун дунёга машур қилган «Қиш сонатаси»даги икки образ ижроси бўлди. Актёр қанчалар таниқли ва маҳоратли бўлмасин, бугунга қадар 16 дан ортиқ фильм-сериалларда суратга тушган ва ўндан ортиқ мукофотларга сазовор бўлган. У актриса ва модель Пак Су Жин билан 2015 йилда турмуш қурган, бир ўғил ва қизи бор.
Южин
Чхве Жиу
1975 йил 11 июнда Кореянинг Кенгидо шаҳрида туғилган.1994 йил МБC компанияси томонидан ташкиллаштирилган иқтидорлилар танловида иштирок этиб, кўзга кўринган ва 1995 йил «Уруш ва севги» фильмида рол ижро этган. Шундан сўнг биринчи маротаба Пе Ён Чун билан «Биринчи муҳаббат» картинаси суратга олинаётган пайтда танишади. «Қиш сонатаси» сериали актрисага нафақат Кореяда, балки Японияда ҳам машҳурлик олиб келди ва уни «Малика Чхве» деб аташади.
Актриса 2018 йил 29 мартда турмушга чиқди. Тўйга фақатгина 40 киши таклиф қилинган бўлиб, уларнинг дўстлари ва яқинлари ташриф буюрган. Шунингдек, тўй ва бўлажак куёв ҳақида барчасини сир тутган. Аммо кейинчалик маълум бўлишича, актрисанинг турмуш ўртоғи ўзидан 12 ёш кичкина. Улар 2020 йил 16 майда қиз фарзандли бўлди.
Ким Санхёк
Пак Ён Ха
1977 йил 12 августда Сеулда дунёга келган. Актёр «Қиш сонатаси» фильмидан сўнг маҳшурликка эришди ва ўзини қўшиқчиликда ҳам синаб кўрди. Шундан сўнг унинг бир қанча альбомлари мухлисларга тақдим этилди. 2010 йил 30 июнь куни актёр ўзининг уйида ўлик ҳолда топилган. У ўзини электр симига осган эди. Пак Ён Ханинг ўз жонига қасд қилишининг тахминий сабаби стресс бўлиши мумкин. Маълумотларга кўра, Японияда режалаштирилган концерт дастури чипталари сотилган, аммо у охирги пайтда ўз компаниясини бошқаришда қийинчиликларга дуч келган. Шунингдек, унинг отаси саратон касаллигидан азият чекаётган бўлган. Онасининг айтишича, у охирги пайтларда ҳаётдан кўп нолир, ҳатто отасининг ўрнида бўлиш истагини ҳам билдирган. Айниқса, у ўлимидан бир кун аввал бемор отасидан қайта-қайта кечирим сўраган.
О Черин
Пак Сол Ми
1978 йил 3 январда Сеулда туғилган. Илк дебютини «Қиш сонатаси« сериалида ижро этган. 2013 йилда Пак Сол Ми актёр Хан Же Сок билан оила қурди. Икки нафар қиз фарзанди бор.
«Қиш сонатаси»нинг мусиқалари ҳам томошабинлар учун ҳамон севимли.
Мавзуга доир:
Изоҳ (0)