Microsoft асосчиси ва миллиардер Билл Гейтс кейинги йигирма йил ичида ўз бойлигининг 99 фоизини хайрия ишларига сарфлашга қарор қилганини эълон қилди. Бу ҳақда у ўзининг веб-сайтида маълум қилган.
“Вафотимдан сўнг, мен ҳақимда турли гаплар айтилиши мумкин. Лекин мен ҳақимда “у бой бўлиб ўлди”, деган гапни айтилмаслигига қатъий азм қилганман”, дейди Билл Гейтс.
У шу билан бирга америкалик магнат ва хайриячи Эндрю Карнегининг “бой бўлиб ўлган одам шарманда бўлиб ўлади”, деган сўзларини келтирган.
Маълумотларга кўра, Гейтс ўз пулининг 99 фоизини тарқаца ҳам, барибир миллиардер бўлиб қолади. У ўз қарори ҳақидаги матнда ҳозирда унинг бойлиги 108 миллиард долларга баҳоланаётганини кўрсатувчи графикни жойлаштирган.
Гейтслар жамғармаси (Билл ва Мелинда Гейтс жамғармаси) узоқ вақтдан бери соғлиқни сақлаш ва бошқа соҳалардаги лойиҳаларни молиялаштириб келмоқда.
Microsoft асосчисининг тушунтиришича, у харажатларни тезлаштиришга қарор қилган: илгари у рафиқаси билан жамғарма улар вафотидан кейин ўнлаб йиллар давомида ишлашини режалаштирган бўлса, энди жамғарма барча маблағларни тарқатиб, 2045 йилда фаолиятини якунлашини қарор қилган.
Билл Гейтс бу йил кузда ўзининг 70 ёшини қаршилайди.
Миллиардернинг ҳисоб-китобларига кўра, 20 йил ичида унинг жамғармаси тахминан 200 миллиард доллар сарфлайди ва якуний сумма бозор ҳолати ва инфляцияга боғлиқ бўлади. 25 йиллик фаолияти давомида Гейтслар жамғармаси аллақачон турли мамлакатларда соғлиқни сақлаш ва ривожланиш учун 100 миллиард ажратган.
“Келгуси йигирма йил ичида жамғарма учта асосий мақсадни кўзлайди. Олдини олиш мумкин бўлган, аммо ҳали ҳам оналар ва болалар ўлимига сабаб бўлаётган касалликларни бартараф этиш, безгак ва қизамиқ каби юқумли касалликлар устидан ғалаба қозониш, ҳамда турли мамлакатлардаги юз миллионлаб аҳолини қашшоқликдан қутқариш”, дейди у ўз баёнотида.
BBC’га берган интервьюсида бу қарорга нима сабаб бўлгани ҳақидаги саволга жавобан Гейтс йигирма йилдан сўнг дунёда бошқа бой одамлар пайдо бўлишини ва улар одамларга муаммоларни ҳал қилишда қандай ёрдам беришни яхшироқ тушунишини айтган.
“Бу ерда гап шошилинчликда. Агар абадий яшамоқчи бўлмасак, кўпроқ маблағ сарфлашимиз мумкин ва бу харажатлар менинг қадриятларимга мос келишини биламан”, деди Гейтс.
Билл Гейтс ва Пол Аллен 1975 йилда Microsoft компаниясига асос солган. Бу йил компьютер ва ахборот технологиялари оламидаги бу гигант ярим асрга тўлади. Гейтснинг ўзи 2000 йилда компания бош директори лавозимидан, 2014 йилда бошқарув раиси лавозимидан, 2020 йилда эса директорлар кенгашидан кетган.
Изоҳ (0)