“Ҳаят Таҳрир аш-Шом” гуруҳи етакчиси Аҳмад ал-Шараъа (Абу Муҳаммад ал-Жулоний) Суриянинг ўтиш даври президенти деб эълон қилинди. Бу ҳақда исёнчилар коалицияси қўмондони Ҳасан Абдул Ғани маълум қилди.
Ал-Шараъа мамлакатнинг янги конституцияси қабул қилингунга қадар амал қиладиган вақтинчалик қонунчилик кенгашини шакллантириш билан шуғулланади. Суриянинг янги ҳукумати армия ва хавфсизлик хизматларини тарқатиб юборди. Уларнинг ўрнига фуқаролар хавфсизлигини таъминлайдиган янги тузилма пайдо бўлади.
Шунингдек, 1963 йилда Сурияда ҳокимиятга келган Араб социалистик уйғониш партияси (БААС) тарқатиб юборилгани эълон қилинди. 2000 йилдан буён унинг бош котиби собиқ президент Башар Асад эди.
Асад режими қулаши
Ноябрь ойи охирида қуролли исёнчилар, асосан ҲЦҲ жангчилари Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди. 10 декабрь куни Идлиб шаҳрида исёнчиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлаганди. У фуқароларга қарата қилган телевидение мурожаатида бу лавозимни камида 2025 йил 1 мартгача эгаллаб туришини айтган. Эндиликда ал-Жулоний Сурия президенти деб эълон қилинди.
Суриянинг янги ҳукумати Россияга талаб қўйди
Россия делегацияси 28 январь куни Сурияга ташриф буюрди. Бу Башар Асад режими қулаганидан кейинги илк учрашув ҳисобланади. Делегация таркибига ташқи ишлар вазири ўринбосари Михаил Богданов ва президентнинг Сурия бўйича махсус вакили Александр Лаврентев кирган. Учрашув давомида томонлар Суриядаги Россия ҳарбий базаларига нисбатан ҳозирча ҳеч нарса ўзгармаган, деган хулосага келган.
Манбаларга кўра, Суриянинг янги ҳукумати Россияга ишончни тиклаш учун ундан компенсация, реконструкция ва қайта тиклаш каби аниқ чора-тадбирлар талаб қилган. Шунингдек, Россиядан мамлакат собиқ президенти Башар Асадни мамлакатга қайтариш сўралган.
Кремль компенсация талаблари ҳақидаги хабарларга изоҳ бермаган.
“Мен буни ҳеч қандай изоҳсиз қолдираман. Биз Сурия ҳукумати билан мулоқотни давом эттирамиз”, деди Россия президенти матбуот котиби Дмитрий Песков. Унинг сўзларига кўра, бу “муҳим алоқалар” ҳисобланади.
Изоҳ (0)