Netflix стриминг платформасида тақдим этилган Жанубий Кореянинг янги “Карма” (“Қайтар дунё”) сериали аллақачон киносеварлар орасида машҳурликка эришди. NDTV нашрининг ёзишича, триллер жанридаги бу картинага катта муваффақият башорат қилинмоқда — лойиҳа машҳур “Калмар ўйини” сериали даражасига ҳам етиши мумкин.
Сўнгги йилларда жанубий кореялик ижодкорлар томонидан ишланган сериаллар бутун дунёда оммалашиб, кўришлар сони бўйича рекордлар ўрнатмоқда. Netflix томонидан суратга олинган янги триллер 2025 йил 4 апрелда намойиш этилди. Премьерадан кўп ўтмай, уни “барча даврларнинг энг ҳайратланарли триллери” деб аташди, сюжет эса “кўз уза олмайдиган даражада қизиқарли”, дея таърифланмоқда.
Сериал даҳшатли жиноят туфайли тақдирлари ўзаро туташган олти киши ҳақида ҳикоя қилади. Бош ролларда Пак Хе Су, Шин Мин А ва Ли Хи Жун иштирок этган. Пак Хе Су бутун дунёга “Калмар ўйини” сериалидаги Чо Сан У (218-рақамли ўйинчи) роли билан танилган эди.
“Карма” бир фаслдан иборат бўлиб, олти қисмни ўз ичига олади. Ҳар бир қаҳрамон ўзининг қоронғи ўтмиши билан юзлашади ва шафқатсиз ҳақиқатга тик боқади. Ҳикоянинг муҳим бурилиш нуқтасида эса қаҳрамонлардан бири ҳалок бўлади, бу эса тасодифлар занжирини узиб қўйилишига олиб келади.
Сериал трейлерда кўрсатилган саҳна билан бошланади: танасининг катта қисми куйган эркак касалхонага олиб келинади. У шифокорга ўз исмини айтгач, аёл воқеа ортидаги даҳшатли сир ётганини тушунади — айнан шу сир атрофида бутун сюжет қурилади. Кейин эса воқеалар 15 кун олдинги даврга қайтади ва томошабин олти қаҳрамон қандай боғланганини, ҳамда ўша куйган одамга нима бўлганини аста-секин тушуна бошлайди.
Rotten Tomatoes сайтида “Карма” сериали 80 фоизлик ижобий баҳо олди — бу эса лойиҳанинг танқидчилар томонидан ижобий кутиб олинганини кўрсатади.
Изоҳ (0)