Бугун, 11 апрель куни халқаро бозорда олтин нархи илк бор 3 250 доллардан ошди. Бу тарихий рекорд ҳисобланади. Нархларнинг кескин кўтарилишига савдо урушлари сабаб глобал иқтисодиётда юз бераётган зўриқишлар ҳамда улар келтириб чиқараётган хавотирлар туртки бермоқда. Қолаверса, бунга АҚШ долларининг қадрсизланаётгани ҳам таъсир кўрсатяпти.
Comex биржасида июнь ойи фьючерслари 2,2 фоизга ошиб, бир унсия учун 3 246,2 долларга етди. Савдолар чоғида нарх 3 255,9 долларни ташкил этди – бу тарихий рекорд ҳисобланади.
Мутахассисларга кўра, АҚШ валютасининг заифлашуви олтин нархининг кўтарилишига асосий сабаблардан бири бўлиши мумкин. DXY доллари индекси 2022 йилдан бери энг паст кўрсаткичга тушиб, 1 фоизга пасайди. Trading Economics агентлиги бу ҳолатни савдо уруши сабаб хорижий инвесторлар ишончининг пасайиши билан изоҳламоқда.
Ҳафта бошида АҚШ кўплаб давлатлар билан божлар бўйича музокаралар ўтказиш учун 90 кунлик танаффус эълон қилган эди. Бироқ бу Хитойга нисбатан 145 фоизга етган бож тарифлари учун тааллуқли эмас. Оқ уйнинг мазкур қарорига жавобан Хитой ҳам божхона тарифларини 125 фоизгача оширди.
Таҳлилчиларнинг айтишича, улар ўртасидаги кескинлик глобал иқтисодий инқироз хавфини оширмоқда. Шундай вазиятда инвесторлар хавфсиз деб ҳисобланган активлар, жумладан, олтинга сармоя киритишга интилмоқда.
“Биз олтин нархи ўсишда давом этади, деб ҳисоблаймиз. Тахминларга кўра, унинг баҳоси яқин ойларда 3 400–3 500 долларга етиши мумкин”, деди UBS таҳлилчиси Жованни Стауново.
Сўнгги икки йил ичида олтин нархи кескин ошди: 2023 йил бошида бир троя унсияси 1 900 доллар атрофида бўлган бўлса, 2025 йил апрель ойига келиб бу кўрсаткич илк бор 3 250 доллардан ошди.
Изоҳ (0)