Президенти Дональд Трамп жорий этган янги божлар сабабли iPhone АҚШда ишлаб чиқарила бошланса, унинг нархи уч баравар ошиши кутилмоқда. Бу ҳақда CNN хабар берди.
Wedbush Sеcurities молиявий компанияси таҳлилчиси Ден Айвзга кўра, iPhone нархи, тахминан, 3500 долларгача қимматлашиши мумкин. Мутахассис буни ҳозирда Осиёда мавжуд мураккаб ишлаб чиқариш экотизимини қайта яратиш зарурати билан изоҳламоқда.
Телефонларни Ғарбий Виржиния ва Нью Жерси штатларидаги заводда ишлаб чиқарасиз. Бу 3500 долларлик iPhone бўлади, деди у.
Юқоридаги заводлар компьютер микросхемаларини ишлаб чиқаради. Айвз ҳатто ишлаб чиқариш ҳажмининг 10 фоизини АҚШга кўчирилиши тахминан 30 миллиард долларга тушиши ва 3 йил талаб этишини айтди.
Смартфон қисмларини ишлаб чиқариш ва йиғиш ўнлаб йиллар олдин Осиёга кўчирилган. Чунки Америка компаниялари асосан дастурий таъминотни ишлаб чиқиш ва маҳсулот дизайнига эътибор қаратади. Бу ҳаракат Apple’ни дунёдаги энг қиммат компаниялардан бирига айлантиришга ёрдам берди.
Бож хавотирлари Apple акцияларини қулатди
Январь ойида Apple акциялари нархи тахминан 25 фоизга тушиб кетди. Бунга АҚШ божларининг Хитой ва Тайванга боғлиқ Apple таъминот занжирига салбий таъсир кўрсатиши мумкин, деган хавотирлар сабаб бўлган.
Февраль ойида Apple Хитойдан ташқарида ишлаб чиқаришни кенгайтириш ва Трампнинг мамлакатга нисбатан божларидан қочиш учун кейинги тўрт йил ичида АҚШга 500 миллиард доллар сармоя киритишини эълон қилди.
Техник таҳлилчилар таъминот занжирлари ўзгармаган тақдирда ҳам, iPhone нархлари ошиши мумкин, деган фикрда. Нью Йоркнинг Rosenblatt Sеcurities инвестиция банкига кўра, агар Apple юқори тарифларнинг барча харажатларини истеъмолчилар зиммасига юкласа, iPhone 43 фоизга қимматлашиши мумкин.
Counterpoint Research компаниясининг тадқиқотлар бўйича вице-президенти Нил Шоҳнинг фикрича, iPhone, тахминан, 30 фоизга қимматроқ бўлиши мумкин. Аммо бу уларнинг қаерда ишлаб чиқарилганига боғлиқ бўлиши кутилмоқда.
Изоҳ (0)