Ўзбекистонда ўзини ўзи банд қилган ҳолда таксичилик билан шуғулланишга доимий рухсат берилади. Президент матбуот хизматининг хабар беришича, бу ҳақда 11 январь куни транспорт ва логистика тизимини янада ривожлантириш чора-тадбирлари бўйича тақдимотда маълум қилинди.
Тақдимотда йўналишсиз такси хизматларига тегишли масала ҳам кўриб чиқилган. Икки йил олдин жисмоний шахсларга ўзини ўзи банд қилган ҳолда таксичилик қилишига вақтинчалик рухсат берилган эди. Бунинг натижасида таксичилар сони 6 баробар ошиб, 457 мингга етди. Шу боис энди бу тартиб доимий бўлиши айтилди.
Таксиларга мижоз топишда қулай ахборот хизматлари бозори шаклланди. Тақдимотда қайд этилишича, ҳозирда 151 та агрегатор компаниялар иш юритяпти ва бу яна ўсиб боряпти. Шу боис агрегаторлар фаолиятини тартибга солиш, уларнинг давлат, ҳайдовчи ва йўловчилар олдидаги мажбуриятини аниқ белгилаш вазифаси қўйилди.
Фуқаролар ўзини ўзи банд қилган шахс сифатида рўйхатдан ўтиб, енгил автомобилда йўловчи ташиш фаолиятини амалга оширишига 2022 йил 1 сентябрдан 2024 йил охирига қадар рухсат берилганди. Бунинг учун ҳайдовчилар аввало давлат Солиқ инспекцияси ҳудудий бўлимларига бориб ўзини ўзи банд бўлган шахс сифатида рўйхатдан ўтади. 300 минг сўм тўлаб гувоҳнома олади.
Сўнгра давлат хизматлари марказига бориб қўлидаги гувоҳномага асосан йўловчи ташиш лицензия варақаси олиш учун 1 йилга давлат божи тўлаб лицензия варақаси олади. Тўлов — 300 минг сўм. Шунда ҳайдовчи жами бўлиб 1 йилга 600 минг сўм сарф қилади. Бошқа, кунлик тўловлар йўқ.
Изоҳ (0)