Samarqand viloyati Nurobod tumanida jamoasi yutqizgani uchun haydovchi mashinasini odamlar ustiga haydadi. Bu haqda YHXX xabar berdi.
Unga ko‘ra, Nurobod tumanida joylashgan umumtaʼlim maktabi oldidagi futbol maydonchasida Nexia haydovchisi o‘zi va o‘zgalar hayotiga xavf tug‘dirib, turli qoidabuzarliklar sodir etgan. Mazkur holat yuzasidan YHXB xodimlari tomonidan olib borilgan surishtiruv ishlari natijasida haydovchi va avtomashina topildi.
Haydovchiga nisbatan qonuniy tartibda maʼmuriy bayonnoma rasmiylashtirilib, mashina vaqtinchalik jarima maydonchasiga olib kelindi.
“Komanda”m yutqizib qo‘ygani sababli jahl ustida mashinamga o‘tirib, futbol maydonchasiga kirdim va qo‘pollik qildim. Bilmagan holda qildim. Jahl ustida avtomashina boshqarib, jarima maydonchasigacha keldim, deydi haydovchi.
2024-yil 29-may kuni soat 18:00 larda Surxondaryo viloyatining Sayxunobod tumanida futbol maydonidagi odamlar ustiga mashina haydagan haydovchi qo‘lga olingan edi. Unga nisbatan 4 yil 6 oy ozodlikdan mahrum qilish jazosi tayinlangan.
Sud hukmiga ko‘ra mazkur avtomashinani davlat daromadiga o‘tkazish belgilanib, ijrosi Majburiy ijro byurosiga yuklatilgan edi. Byuroning Sayxunobod tuman bo‘limi tomonidan olib borilgan ijro harakatlari davomida mazkur avtomashina baholangan va auksionga chiqarilgan.
Joriy yilning 3-mart kuni o‘tkazilgan auksionda mashina 100 mln 567 ming so‘mga sotilib, sotuvdan tushgan mablag‘ davlat daromadiga o‘tkazilishi ta’minlandi.
Izoh (0)