Андижонда Wi-Fi роутер ўрнатиб ҳаракатланган Equinox ҳайдовчисига чора кўрилди. Бу ҳақда Андижон вилоят йўл ҳаракати хавфсизлиги бошқармаси матбуот хизмати хабар бермоқда.
Қайд этилишича, ижтимоий тармоқларда 2001 йилда туғилган ҳайдовчи А.Т.га тегишли бўлган Equinox русумли транспорт воситасига рухсат этилмаган қурилма (Wi-Fi антенна) ўрнатиб олган ҳолатда ҳаракатлангани акс этган видео кенг жамоатчилик эътирозига сабаб бўлган.
Мазкур ҳолат юзасидан ЙҲХБ ходимлари томонидан ўтказилган тезкор суриштирув давомида қоидабузар ҳайдовчи аниқланиб, унга нисбатан баённома тузилиб, транспорт воситаси вақтинчалик сақлаш учун жарима майдонига жойлаштирилган.
Бундан ташқари, ўрганиш давомида ушбу ҳайдовчи ўтган бир йил давомида содир этган қоидабузарлик ҳолатлари текширилганида ўндан ортиқ қўпол турдаги қоидабузарлик содир этганлиги ва ҳар бир ҳолат учун тегишли чоралар кўрилганлиги аниқланди.
Шунингдек, хабарда ҳайдовчининг вилоят ЙҲХБ мутасаддиларига алоқаси йўқлиги таъкидлаб ўтилган.
Изоҳ (0)