Coca-Cola компанияси ўз маҳсулотларини Бельгия, Буюк Британия, Люксембург, Нидерландия, Франция ва Германия бозорларидан оммавий равишда қайтариб олмоқда. Бу ҳақда BBC хабар берди.
Бунга ичимликлар таркибида хлоратларнинг (кимёвий модда) кўплиги сабаб бўлган. Компания аниқ рақамларга эга эмаслигини айтган, аммо гап дўконларда ҳам, савдо автоматларида ҳам сотиладиган катта миқдордаги товарлар ҳақида кетмоқда. Чоралар 2024 йилнинг ноябрь ойи охиридан буён чиқарилган банка ва шишалардаги Coca-Cola, Sprite, Fanta, Fuze Tea, Minute Maid, Nalu, Royal Bliss ва Tropico маркаларига тааллуқли. Муаммо ичимликлар сифатини меъёрий талабларга мувофиқлигини текшириш пайтида аниқланган.
“Фақат 328G дан 338G гача ишлаб чиқариш кодлари бўлган банкалар ва шишалар қайтариб олиниши лозим. Ишлаб чиқариш кодини маҳсулотнинг яроқлилик муддати остида топиш мумкин”, дейилади хабарда.
Эълон қилинган маълумотларга кўра, стандартларга жавоб бермайдиган маҳсулотларнинг аксарияти аллақачон муомаладан чиқарилган ёки бозорларга киритилмаган. Қолган партияни олиб қўйиш бўйича ташкилот юқоридаги давлатларнинг тегишли идоралари билан ҳамкорлик қилмоқда.
Аввалроқ Францияда олиб борилган тадқиқотларда пластик баклажкалардаги Coca-Cola ичимлиги таркибида камида 6 хил турдаги пластиклар аниқланганди. Тадқиқотлар микро ва нанопластикларни аниқлашга ихтисослашган иккита лабораторияда ўтказилган.
Олимлар Schweppes ва Coca-Cola газли ичимликларни 1, 10 ва 20 марта очгандан сўнг ундаги микропластик заррачалар миқдорини ўлчаган. Натижада баклажкалар қопқоғи қанчалик кўп очилса, газли ичимликка шунчалик кўп микропластик заррачалар тушган.
Coca-Cola муносабати
Schweppes ва Coca-Cola компанияси вакиллари мазкур тадқиқотга муносабат билдирган. Компаниялар ичимлик идишларининг барчаси озиқ-овқат маҳсулотлари сифатига қўйиладиган талабларга жавоб беришини ва микропластика, “агар у аниқланса ҳам қасддан идишга киритилмаслигини” билдирган.
“Ҳозирги кунда пластик зарраларни ютиш инсон саломатлиги учун муаммо туғдиришига оид илмий далиллар йўқ”, дея таъкидлаган қилган Coca-Cola компанияси.
Изоҳ (0)