Instagram’да Кокош тахаллуси билан вайнлар суратга оладиган 33 ёшли блогер Комила Абдуқодирова Тошкентдаги хусусий клиникада липосакция ва абдоминопластика амалиётларини бошдан кечирганидан сўнг, операция асоратлари билан курашмоқда.
— Мен 3 март куни абдоминопластика ва липосакция операцияларини қилдиргандим, шу билан 25 кундан буён ётибман. Операциянинг эртаси куни қорнимдаги қора доғни кўриб, шифокордан “Бу нима?” деб сўрасам, “гематома”, деб жавоб беришди. Яъни қонталаш бўлиб қолган, кетади, дейишди. Шу билан орадан 25 кун ўтди, лекин қора доғ кетмади. Шундан сўнг хавотирланиб, бошқа докторларга мурожаат қилдим. Улар эса “Бу некроз, зудлик билан қаратинг”, дейишди.
Кейин мен буларга айтиб, жанжал қилганимдан сўнг эътибор қаратишди. Қора жойини олиб ташланглар, дедим. У нарса олиб ташланганидан кейин ҳозир қорним очилиб ётибди. Мени аппаратга улаб қўйишган. Сизлардан илтимосим, бу клиникага умуман келманглар. Мени операция қилган бола 2002 йилда туғилган, ҳужжати ҳам йўқ экан. У ҳали талаба, операция хонасига умуман кириши мумкинмас экан, қўпол қилиб айтганда улар қассоблик қилишди. Бу клиникага қўлингизни боғлатиш учун ҳам келманг”, дейди Комила Абдуқодирова.
“Меd Consultant” хусусий клиникаси томонидан берилган маълумотномада Комила Абдуқодировага қорин тери ости ёғ қаватини найчалаш (липосакция, абдоминопластика) амалиёти бепул ўтказилгани қайд этилган.
“Амалиётдан кейинги даволаниш жараёнида беморга берилган тавсияларга (кўчага чиқмаслик, машина ҳайдамаслик, энергетик ичимликлар ичмаслик) риоя қилмаслиги оқибатида жароҳат соҳасида яллиғланиш ва терида тахминан 5-6 сантиметрли тўқима некрози юзага келди. Шундан сўнг беморга амалиётдан кейинги некроз тўқималарни олиб ташлаш ва ярага манфий босимли даволаш тизими қўйилди”, дейилади маълумотномада.
Комила Абдуқодированинг яқинлари уни Туркияга олиб кетиб, ўша ерда даволатиш чоралари кўрилаётганини айтмоқда.
Кокош Instagramъда 455 минг обуначига эга, у асосан кулгили вайнлар суратга олади.
2024 йилнинг декабрь ойида худди шундай амалиётни бошдан кечирган актриса Ҳалима Ибрагимова тери битмаслиги оқибатида вафот этганди.
Изоҳ (1)
Аллоҳни берган неъматини борича қабул қилиш керак. Танага бўлар бўлмас ўзгартириш киргизиш бандасигамас, қачонки соғлиққа хавфи бўлсагина рухсат этилган. Аллоҳга хуш келмайдиган иш қилиш шунақа оқибатларга олиб келади