Нурсултон Рўзибоевнинг навбатдаги рақиби Брайан Баттл 16 августдан 17 августга ўтар кечаси ўтказиладиган жангдан олдин ўтказиладиган тадбирларнинг бирида ўзбекистонлик мухлисларни ҳақорат қилди. Бу ҳақда Euroasia нашри хабар берди.
Ҳар сафар Instagram’га кирганимда, юзлаб янги изоҳларни кўраман. Менимча, Ўзбекистонда бўш вақтини бекор ўтказадиган жуда кўп йигитлар бор. Instagram уларнинг тилини таржима қила олмаяпти, шунинг учун нима ёзаётганини тушунмайман. Таржима тугмасини босавераман, лекин барибир таржима чиқмайди. Фақат “Нурсултон” деган ёзув, Ўзбекистон байроғи ва таржима қилиб бўлмайдиган бир нечта сўзлар бор, шунинг учун нима дейишаётганини умуман билмайман, — деди UFC жангчиси.
Маълумот учун, Рўзибоев ва Баттл ўртасидаги баҳс 17 август тонгида (АҚШ вақти билан 16 август) АҚШнинг Чикаго шаҳрида бўлиб ўтадиган UFC 319 турнири доирасида бўлиб ўтади.
30 ёшли Баттл UFC’да 2021 йил 28 августдан бери фаолият юритиб келмоқда. Ҳозиргача у промоушенда 7 та ғалаба, 1 та мағлубият ва 1 та NC (жанг ўтказилмаган) натижаларини қайд этган. У сўнгги жангини 2024 йил 7 декабрда Ренди Браунга қарши ўтказган ва ҳакамларнинг якдил қарорига кўра ғалаба қозонган.
Рўзибоев ҳозирга қадар фаолияти давомида 47 та жанг ўтказиб, улардан 36 тасида ғалаба қозонган, 9 марта мағлуб бўлган ва 2 марта дуранг қайд этган. Брайан Баттлга қарши баҳс Рўзибоевнинг UFC’даги олтинчи жангига айланади. Бунгача у ушбу промоушенда 5 маротаба октагонга кўтарилиб, 4 та ғалаба ва 1 та мағлубият қайд этган.
Изоҳ (0)