Россия ядровий каллак ва ядровий двигателга эга янги “Буревестник” қанотли ракетасини синовдан ўтказишга ҳозирлик кўрмоқда. Бу ҳақда таҳлилчиларга таяниб, Reuters хабар берди.
Маълум қилинишича, Калифорниядаги Монтере Халқаро тадқиқотлар институтидан Жеффри Льюис ва Виржиниядаги CNA таҳлилий марказидан Деккер Эвелит Planet Labs сунъий йўлдоши тасвирларини ўрганиб, ушбу хулосага келган.
Мутахассисларга кўра, Баренс денгизидаги Новая Земля оролларида жойлашган Панково полигонида жонланиш кузатилмоқда — ходимлар, техника, кемалар ва самолётлар сони ортган. Бу воситалар аввал “9М730 Буревестник” ракетаси синовларида ҳам иштирок этган эди.
Льюиснинг таъкидлашича, учиш майдончасида ҳаракатлар кўпайган, операцияларни таъминлаш учун зарур жиҳозлар олиб келинмоқда. Манбаларга кўра, синов шу ҳафта ичида бўлиб ўтиши мумкин. Оқ уй, Пентагон, Марказий разведка бошқармаси ва Россия Мудофаа вазирлиги ушбу вазиятга ҳозирча изоҳ бермади.
Россия президенти Владимир Путин “Буревестник” ҳақида биринчи марта 2018 йилда Федерал мажлисга мурожаат қилганда гапирган эди. У ракетанинг жуда узоқ масофага учиши ва кутилмаган парвоз йўналишига эга эканини айтган.
АҚШнинг Nuclear Threat Initiative маркази маълумотига кўра, 2017–2019 йиллар оралиғида Россия камида 13 марта “Буревестник”ни синаган, бироқ фақат 2 та синов қисман муваффақиятли ўтган. 2019 йил август ойида Северодвинск яқинида бўлиб ўтган портлаш оқибатида “Росатом” ва Мудофаа вазирлигининг 7 нафар ходими ҳалок бўлган. Таҳлилчилар бу портлаш айнан “Буревестник”нинг муваффақиятсиз синови оқибати эканини истисно этмаган.
Путин 2023 йил октябрь ойида ракетанинг ядровий двигателга эга версияси сўнгги муваффақиятли синовдан ўтгани ҳақида маълум қилган эди. The New York Times ўша пайтда сунъий йўлдош тасвирларини ўрганиб, синовлар Новая Земляда ўтказилган бўлиши мумкинлигини ёзган.
Изоҳ (0)