Биткоин курси 14 август куни тарихда илк бор 124 минг доллардан ошди. Бицтамп биржасига кўра, савдо вақтида криптовалюта нархи 124 279 долларгача етиб, кейин 122 минг долларга тушди. Бу ҳақда Deutsche Welle хабар берди.
CoinMarketCap маълумотига кўра, нарх ошганидан сўнг биткоин бозор қиймати қарийб 2,5 триллион долларни ташкил этмоқда. Мутахассислар бу ўсишни йирик институционал инвесторлар талабининг ортиши, АҚШ федерал резерв тизимининг пул-кредит сиёсатини юмшатиши ҳамда фонд бозорларидаги ижобий кайфият билан изоҳламоқда.
Нарх ўсишининг энг муҳим омилларидан бири сифатида Дональд Трамп бошчилигидаги АҚШ маъмуриятининг криптовалюталарга нисбатан ижобий ёндашуви тилга олинмоқда. Биткоин 2025 йил бошидан бери қарийб 32 фоизга ошган.
“Агар биткоин 125 минг доллардан юқорида мустаҳкам турса, у 150 минг долларгача кўтарилиши мумкин”, деди таҳлилчиси Тони Сайкамор.
Биткоин — бу дунёдаги биринчи ва энг йирик криптовалюта бўлиб, 2009 йилда Сатоши Накамото тахаллуси остида номаълум шахс ёки гуруҳ томонидан яратилган. У марказлашмаган тизимда ишлайди, яъни уни бошқарадиган ҳукумат ёки марказий банк йўқ. У блокчейн технологиясига асосланган — барча транзакциялар умумий очиқ реестрда сақланади. Айни дамда биткоин дунё бўйлаб миллионлаб фойдаланувчилар томонидан инвестиция воситаси ва тўлов шакли сифатида ишлатилмоқда.
Изоҳ (0)