Арманистон Ташқи ишлар вазирлиги Коллектив хавфсизлик шартномаси ташкилотининг бюджетига йиллик бадалларни тўлаш бўйича тегишли ҳужжатни имзолашдан бош тортди. Бу ҳақда Sputnik Арманистон хабар бермоқда.
Арманистон томони КХШТ котибиятини “КХШТнинг 2024 йилги бюджети тўғрисида”ги қарорни имзолашдан ва шунга мувофиқ ташкилот фаолиятини молиялаштиришда иштирок этишдан ўзини тийиши ҳақида расман хабардор қилди, дейилади ТИВ хабарида.
Шунингдек, идоранинг таъкидлашича, КХШТнинг ички тартиб-қоидаларига мувофиқ, йиллик бюджет тўғрисидаги маълумотлар жамоатчиликка тарқатилмайди.
Россия ташқи ишлар вазири ўринбосари Александр Панкин Арманистон 2025 йил охиригача бадални тўламаса, КХШТга аъзо давлатлар вазиятнинг турли сценарийларини кўриб чиқиши мумкинлигини айтганди.
Ўтган йилнинг май ойида Арманистон ташкилотнинг 2024 йилги бюджетини молиялаштиришдан бош тортишини расман эълон қилган эди. Шунга қарамай, КХШТ вакилларининг маълум қилишича, 2025 йил учун бадал суммаси барибир ҳисобланади.
Арманистон бош вазири Никол Пашинян аввалроқ мамлакатнинг КХШТ фаолиятидаги иштироки тўхтатилишини бир неча бор таъкидлаган эди.
Сентябрь ойида у ташкилотни Арманистон учун “хавфсизликка таҳдид” деб таърифлаган ва у билан муносабатларда ортга қайтмаслик нуқтаси аллақачон ўтилганини айтган. Россия президенти матбуот котиби Дмитрий Песков Арманистон бош вазирининг позициясига норозилик билдириб, КХШТ аъзо мамлакатлар суверенитетини ҳимоя қилиш учун яратилганини ва ҳеч қандай таҳдидга эга эмаслигини таъкидлаган.
Изоҳ (0)