Тожикистонда VI-VIII асрларга оид қаср харобалари топилди (фото)

Тожикистонднинг Пенжикент шаҳрида жойлашган тарихий обида ҳудудидан археологлар қаср харобаларини топди. Бу ҳақда “t-nеws.tj” хабар берди.

Харобаларни Миллий музей археология ва нумизматика бўлими бош мутахассиси Муҳсин Бобомуллоев топган.

Тадқиқот натижасида қалъа икки қаватдан иборат экани маълум бўлган. Биринчи қават тахта материалдан, иккинчи қават 50х25х10 ўлчамдаги пишмаган ғиштдан қурилган.

Тарихий давр VI-VIII асрларга тўғри келади, қалъа хорижликлар босқини натижасида вайрон бўлган ва ёқиб юборилган. Мемориал йўлак деворларида кул ва куйик излари қолдиқлари бунинг исботидир, — дейилади хабарда.

Шунингдек, ушбу ёдгорлик ҳудудидан майда буюмлар: мис ва кумуш тангалар, узуклар ҳамда безак буюмлари топилган:

Қайд этилишича, тарихий манбаларда Пенжикент ва Маймурғдаги ўхшаш иншоотлар ҳақида маълумотлар келган. Ёдгорлик Тожикистоннинг тарих ва маданият ёдгорликлари реестрида рўйхатга олиниши режалаштирилган.

Иш шу билан тугамайди: жорий йилнинг июль август ойларида тожик археологлари Россия Давлат Эрмитажи мутахассислари билан биргаликда ёдгорликда қўшимча тадқиқотлар олиб боради, — дейилади музей хабарида.