Қозоғистон ҳукумати мамлакатда “этносиёсийлаштирилган рамзлар” тасвирланган товарларга тақиқ жорий этиш масаласини кўриб чиқмоқда — гап “Вагнер” хусусий ҳарбий компаниясининг рамзлари ва Z ёки V белгилари ҳақида бормоқда. Бу ҳақда “Отамакон” республика тадбиркорлар миллий палатасига таяниб, “Nur.kz” нашри хабар берди.
Ушбу таклиф билан Республика Бош прокуратураси чиққан. Идора матбуот котиби Куат Бапиновнинг сўзларига кўра, “турли этник гуруҳларнинг алоҳида вакиллари жамоат майдонларида турли этник белгиларни намойиш этмоқда”. Хусусан, 2022 йилда Россия ва Украина ўртасида уруш бошланганидан сўнг Қозоғистонда кийим-кечак, машина ва ўйинчоқларда Z ёки V белгилари тез-тез намойиш этилмоқда; чакана савдо тармоқларида Россия армияси рамзлари туширилган товарлар реклама қилиняпти ва сотиляпти, бу эса жамиятда турли салбий реакцияга сабаб бўлган.
Прокуратура ҳукуматга “қуролли тўқнашувларда, бошқа давлат суверенитети ва сиёсий режимига қарши ҳарбий ёки бошқа зўравонлик ҳаракатларида” қарама-қарши томонлар қўллайдиган рамзлар туширилган маҳсулотларни Қозоғистон ҳудудида ишлаб чиқариш, олиб кириш, ташиш ва тарқатишни тақиқлашни, бунинг учун маъмурий жавобгарлик белгилашни таклиф қилди.
Z ва V белгиларининг оммавий намойиши 2022 йил баҳорида Латвия ҳукумати томонидан тақиқланган эди, худди шундай чора Германияда ҳам мавжуд. Украинада Россия армиясининг рамзларига ҳам тақиқ жорий қилинди. “Украинская Правда” таъкидлаганидек, бу белгилар фақат музей кўргазмаларида, дарсликларда ва илмий ишларда ишлатилиши мумкин.
Изоҳ (0)