Бирлашган Араб Амирликлари суди Исроил ва Молдова фуқаролигига эга бўлган раввин Зви Коганни ўлдирган уч нафар Ўзбекистон фуқаросини ўлим жазосига ҳукм қилди. Ўзбекистон ТИВ бу маълумотни “Газета.уз”га тасдиқлади. Аммо мазкур хабар бўйича бошқа тафсилотлар ҳозирча йўқ.
Аввалроқ БАА Ички ишлар вазирлиги гумонланувчиларнинг исм-шарифини маълум қилганди: Олимбой Тоҳирович (29 ёш), Маҳмуджон Абдураҳим (29) ва Азизбек Комилович (34).
Суд ҳукмини давлат тасарруфидаги WAM ахборот агентлиги эълон қилган. Унда қотилликка ёрдам берган тўртинчи шахс умрбод қамоқ жазоси олгани айтилади. Ўлим жазоси ҳукмлари устидан амирлик қонунчилигига кўра апелляция тартибида шикоят қилиниши мумкин.
Исроил ва Молдова фуқаролигига эга бўлган 28 ёшли раввин Зви Коган (Абу-Дабидаги “Хобод” яҳудий диний ҳаракатининг вакили бўлиб, бир неча йил БААда яшаган) 2024 йил ноябрь ойида Дубайда бедарак йўқолган, унинг жасади бир неча кундан кейин Уммон билан чегарадош Ал-Айн шаҳрида топилганди.
Декабрь ойида The Wall Street Journal қотиллар Коганни ўғирлаб кетгани ва уни қўшни Уммонга олиб кетишни режалаштиргани ҳақида хабар берган. Нашр, шунингдек, “баъзи гумонланувчилар” Туркияга қочиб кетганини билдирганди. Исроил ҳукумати раввиннинг ўлдирилишини “аксилсемит теракт ҳаракати” деб атаган.
Ўзбекистон ТИВ раҳбари Бахтиёр Саидов 2024 йил ноябрь ойида Исроил элчиси Гидеон Лустигга раввин Зви Коган вафоти муносабати билан ҳамдардлик билдирганди. Саидовнинг ўшанда ўзбек томони терговда ҳар икки давлат — БАА ва Исроил расмийлари билан ҳамкорлик қилаётганини таъкидлаган.
Изоҳ (0)