Ирландия пойтахти Дублинда 59 ёшли эркак шифокор тавсиясига биноан кўп миқдорда сув ичиб, сув интоксикациясидан вафот этди. Бу ҳақда Daily Mail хабар берди.
Бу касаллик тиббиётда гипонатриемия деб аталади. Шифокорлар жанг санъати афсонаси Брюс Лининг ўлимига ҳам шу касаллик сабаб бўлган деб тахмин қилади.
Етарли миқдорда сув ичиш соғлиқ учун муҳим бўлса-да, ортиқча ва тез-тез сув ичиш қон таркибидаги натрий даражасини пасайтириши мумкин. Натрий тўқималардаги сув миқдорини бошқаришга ёрдам берадиган электролитдир. Агар унинг даражаси пасайса, сув тана ҳужайралари ичида ва атрофида тўплана бошлайди. Бу эса ҳужайраларнинг шишишига сабаб бўлади.
Жараён айниқса бош мия учун хавфли, чунки бош суяги қаттиқ бўлгани учун кенгая олмайди. Мутахассислар бир соат ичида 1,4 литр сув (тахминан олти стакан) ичиш бу ҳолатни келтириб чиқаришини айтмоқда.
Баъзи тадқиқотларга кўра, гипонатриемия билан оғриган ҳар тўртинчи бемор вафот этади. Кунига икки литр сув ичиш — саккиз стакан атрофида — танани сув билан таъминлаш учун жуда муҳим (расмда чапда).
АҚШ Касалликларни назорат қилиш ва олдини олиш маркази соатига 1,4 литрдан кўп сув ичмасликни тавсия қилади. Бу маслаҳат барча суюқликларга тегишли. Гипонатриемия баъзи заиф беморларда нормал сув истеъмоли билан ҳам юзага келиши мумкин.
Сутка давомида 7-8 литр сув ичганлар касалхонага ётқизилган ҳолатлар бўлган. Бу ҳар уч соатда бир литр сув ичишга тенг. Буйрак етишмовчилигидан азият чекадиганлар кўпроқ хавф остида бўлади. Сабаби уларнинг танаси ортиқча суюқликни организмдан тез чиқара олмайди.
Тадқиқотчилар фикрича, кунг-фу бўйича мутахассис Брюс Ли кўп сув ичганидан вафот этган бўлиши мумкин. У 1973 йилнинг ёзида Гонконгда 32 ёшида оламдан ўтган. Жанг санъати устаси ва Голливуд юлдузи мия шишидан вафот этган, ўша пайтда шифокорлар буни оғриқ қолдирувчи воситалар билан боғлаган.
Изоҳ (0)