Буюк Британияда Манго лақабли гапирувчи тўтиқуш полицияга гиёҳванд моддалар савдоси билан шуғулланувчи жиноий гуруҳни аниқлашда ёрдам берди. Бу ҳақда People хабар берди.
Тўтиқуш наркотик сотувчи гуруҳ бошлиғи Адам Гарнеттнинг севгилисига тегишли бўлган. Манго тўтиси “иккитаси 25 га” каби ибораларни такрорлай олган. Бундай ибора кокаин савдосидаги нархга ишора қилган.
Блекпул шаҳрида ўтказилган тинтув давомида полиция катта миқдорда героин, кокаин, кетамин ва каннабисни топган. Шунингдек, терговчилар Гарнеттнинг телефонида гиёҳванд моддалар, пул ва гапирувчи тўтиқуш билан боғлиқ видеоларни аниқлаган. Видеолардан бирида Манго пуллар билан ўйнаб юрган ва сотувчиларнинг ибораларини такрорлаган.
Терговга кўра, 35 ёшли Адам Гарнетт 2023–2024 йилларда қамоқхонада бўлишига қарамай, мобил телефон ва Wi-Fi орқали гуруҳни бошқариб турган. У жиноят содир этгани учун қўшимча 19,5 йилга, унинг севгилиси эса 12 йилга озодликдан маҳрум этилган.
Суд олдига жами 15 киши олиб чиқилган, аммо икки нафар айбланувчи судга келмаган, уларга нисбатан ҳибсга олиш ордери чиқарилган. Тўтиқуш Мангонинг кейинги тақдири номаълумлигича қолмоқда.
- Маълумот ўрнида, апрель ойида АҚШда гапирувчи тўтиқуш ўз эгаси ҳақидаги кичик бир тафсилотни айтиб, жиноий иш бўйича терговни якунлашга ёрдам берган эди.
- Мазкур жиноят 2015 йилда юз берган.
- Ўшанда Гленна Дюрам Мичиган штатидаги уйида турмуш ўртоғи Мартинни отиб ўлдирган, шундан сўнг ўзини ҳам ўлдиришга уринган, бироқ муваффақиятсизликка учраган.
Изоҳ (0)