Ўзбекистон Суперлигасининг 17-туридан ўрин олган баҳсда Наманганнинг “Навбаҳор” жамоаси ўз майдонида Жиззахнинг “Сўғдиёна” клубини қабул қилди.

Ўйин бошидан ташаббусни ўз қўлига олишга интилган Сергей Лушан шогирдлари 7-дақиқада ҳисобни очишга муваффақ бўлди. Меҳмонлар жарима майдончаси ичига етказиб берилган тўпни рақиб футболчиси ушбу учрашувда майдонга “лочинлар” сардори сифатида тушган Забиҳилло Ўринбоевга етказиб берди. Тажрибали ҳужумчи эса ушбу “совға”дан самарали фойдаланди – 1:0.
Иккинчи бўлимни ҳужумкор тарзда бошлаган жиззахликлар 51-дақиқада ҳисобни тенглаштирди. Люпчо Дориевнинг “Навбаҳор” жарима майдончаси ичига етказиб берган тўпини меҳмонларнинг тожикистонлик ҳимоячиси Зоир Жўрабоев боши билан дарвозага аниқ йўллади – 1:1.
Шундан сўнг ўйин суръати тенглашиб, ташаббус гоҳ у, гоҳ бу жамоа тарафида бўлди. Аммо якуний зарбаларга аниқлик етмади. Натижада учрашув жанговар дуранг билан якунланди.
Фотолар муаллифи: Оқилхон Мамажонов


























Изоҳ (0)