Ўзбекистонда кичик ва ўрта бизнес учун янги талабларга уч йиллик мораторий жорий этилади. Бу ҳақда Шавкат Мирзиёевнинг кичик ва ўрта бизнес вакиллари билан соҳани ривожлантириш масалалари бўйича ўтказилаётган учрашувида маълум қилинди.
“Тадбиркорлар учун тенг шароитлар ва адолатли рақобат муҳитини таъминлаш бўйича навбатдаги чора-тадбирлар тўғрисида”ги президент фармони билан 2028 йилгача ҚҚС ва фойда солиғи ставкаси оширилмаслиги белгилаб қўйилганди.
“Эндиликда кичик ва ўрта бизнесга қўшимча талаб ва мажбурият юклайдиган норматив ҳужжатлар қабул қилишга ҳам уч йиллик мораторий эълон қилинади”, деди давлат раҳбари.
Ҳозирда барча тоифадаги тадбиркорларга фаолиятини тугатиш учун бир хил талаб белгиланган. Яъни, каттами-кичикми, барчаси молиявий аудитдан ўтишга мажбур. Оқибатда, ихтиёрий тугатишга ариза берган минглаб кичик корхоналар қачон текширувчи келиб, аудитдан ўтказишини кутиб турибди.
Шу боис бу жараён ҳам соддалашиши эълон қилинди. Эндиликда охирги 3 йиллик айланмаси 10 миллиард сўмдан ошмаган, солиқдан қарзи бўлмаган корхонани ихтиёрий тугатишда текширув ўтказилмайди.
Бундан ташқари, фермерларнинг солиқдан қарзини вақтида тўлай олмагани учун шу пайтгача йиғилиб қолган 1 триллион сўмлик пенясини ундиришдан воз кечилади.
Учрашувда кичик бизнесдаги келгуси қадамларни белгилаб берадиган 5 йиллик стратегия ишлаб чиқилгани таъкидланди. Буни халқаро молия ташкилотлари ҳам қўллаб-қувватлаб, янги бизнес йўналишлари бўйича илғор тажриба, инновация, технология ва халқаро стандартларни жорий қилишда кўмаклашишга, бунинг учун ҳозирни ўзида 470 миллион доллар ресурс ажратишга тайёр.
Жумладан, Осиё тараққиёт банки “Молиявий оммабоплик” дастури доирасида кичик ва ўрта бизнесга 100 миллион доллар, Европа тикланиш ва тараққиёт банки “яшил” ва инновасион лойиҳалар учун 200 миллион доллар, Франция тараққиёт агентлиги аёллар тадбиркорлиги учун 30 миллион евро ажратмоқда.
Изоҳ (0)