АҚШ президенти Дональд Трамп мамлакат Адлия вазирлигига судларда унинг маъмурияти сиёсатига қарши иш олиб бораётган юридик фирмалар ва адвокатларга босим ўтказишни буюрган. Бу ҳақда The Wall Street Journal газетаси маълум қилмоқда.
Газета маълумотларига кўра, Трамп АҚШ адлия вазири ва бош прокурори Пем Бондига “асоссиз ва шов-шувли суд жараёнларини олиб бораётган” ҳуқуқшуносларга нисбатан суд орқали чекловлар ўрнатишга эришиш вазифасини юклаган.
Нашрнинг таъкидлашича, Адлия вазирлиги аллақачон ҳукумат чекловларига дучор бўлиши мумкин бўлган ўндан ортиқ фирмалар рўйхатини тузган. Бундай фирмаларнинг мижозлари илгари тузилган давлат шартномаларидан маҳрум бўлиши мумкин.
Bloomberg агентлигининг ҳисоб-китобларига кўра, Трамп маъмурияти ўз фаолиятининг дастлабки икки ойида унинг қарорларига қарши 150 дан ортиқ даъволарга дуч келган. Судда низолашаётган Америка ҳукумати фаолиятининг асосий йўналишлари орасида ноқонуний миграцияга қарши кураш, хилма-хиллик, тенглик ва инклюзивлик дастурлари (Diversity, Equality and Inclusion, DEI), шунингдек, АҚШ ҳукумати фаолияти самарадорлигини ошириш бўйича идора иши (DOGE) ҳамда давлат хизматчиларини оммавий равишда қисқартириш масалалари бор.
Изоҳ (0)