UFC'нинг икки карра чемпиони Конор Макгрегор Дональд Трамп билан учрашувдан сўнг Ирландия президентлигига номзод бўлиш ниятини билдирди. Бу ҳақда у ўзининг Х ижтимоий тармоғидаги саҳифасида маълум қилган.
Унинг айтишича, дастурининг асосий йўналиши Европа иттифоқининг мигрантларни ЕИ мамлакатларига бир текис тақсимлашни кўзда тутувчи миграция пактига қарши кураш бўлади.
Макгрегор бу масалани референдумга қўйишни ваъда қилиб, қарор Ирландия халқига тегишли бўлиши лозимлигини таъкидлаган.
“Президент бўлганимда, бу қонун лойиҳасини референдумга қўйган бўлардим. Гарчи мен бу пактга қатъиян қарши бўлсам-да, танлов на менга, на давлатга боғлиқ бўлмаслиги керак. Бу Ирландия халқининг танлови! Доимо шундай! Мана бу - ҳақиқий демократия!”, дейди спортчи.
Шунингдек, у ноқонуний миграция борасидаги вазият учун амалдаги ҳукуматни кескин танқид қилиб, айрим шаҳарларда ирландияликлар аллақачон озчиликка айланиб қолганини таъкидлаган.
Илгари Макгрегор Оқ уйда сўзлаган нутқида Ирландия ҳукуматини ноқонуний миграция устидан назоратни йўқотгани учун танқид қилган ва баъзи шаҳарларда оқ танли аҳоли озчиликни ташкил этиб қолганини айтган эди.
Изоҳ (0)