19 март куни Украина президенти Владимир Зеленский ва АҚШ президенти Дональд Трамп ўртасида телефон орқали суҳбат бўлиб ўтди. Бир соатдан ортиқ вақт давом этган мулоқот жуда яхши кечган. Бу ҳақда Америка раҳбари Truth Social ижтимоий тармоғида ёзиб қолдирди.
“Ҳозиргина Украина президенти Зеленский билан жуда самарали телефон суҳбати бўлиб ўтди. У тахминан бир соат давом этди. Суҳбатнинг асосий қисми Россия ва Украинанинг талаб ва эҳтиёжларини мувофиқлаштириш мақсадида кеча Россия Федерацияси президенти Владимир Путин билан ўтказилган музокарага асосланди”, дея таъкидлади Трамп.
Америка раҳбарининг айтишича, у АҚШ давлат котиби Марко Рубио ва миллий хавфсизлик бўйича маслаҳатчиси Майк Уолцдан муҳокама қилинган масалаларнинг батафсил тавсифини беришни сўраган. Яқин вақт ичида тегишли баёнот эълон қилиниши кутилмоқда.
18 март куни АҚШ президенти Дональд Трамп ва Россия президенти Владимир Путин ўртасида Украина уруши бўйича муҳим телефон мулоқоти бўлиб ўтди. Суҳбат якунида етакчилар Россиянинг Украина энергетика инфратузилмасига ҳужумларини 30 кунга тўхтатишга келишиб олдилар.
Икки соат давом этган мулоқот давомида Россия президенти Владимир Путин Трампга Киевга хорижий ҳарбий ёрдам ва разведка маълумотларини беришни тўлиқ тўхтатиш Украинадаги можаронинг янада авж олиб кетмаслиги учун энг муҳим шарт эканини айтган. Шунингдек, у Украина ҳарбий сафарбарликни тўхтатиши кераклигини сўраган.
АҚШ президенти Дональд Трамп мулоқотдан сўнг ўзининг Truth Social ижтимоий тармоғидаги саҳифасида муносабат билдириб, Россия президенти билан “тинчлик шартномасининг кўп қисмларини” муҳокама қилгани ва можарони “тўлиқ куч билан” ҳал этиш жараёни бошланганини маълум қилди.
Изоҳ (0)